New Delhi, Iaiong:
Katkum ki khubor, la ong ba ha ka Sngi U Blei, ki jaitbynriew nong India na kylleng ki ri jong ka pyrthei kynthup ia ka ri Canada, Denmark, England, France, Finland, Germany, Spain bad na US, ki la mih shakhmat ban pyrshah ia ka jingjia thombor ha Pahalgam ha kaba 26 ngut ki la khlad na ka jingleit siat dusmon jong ki lehnoh ka Pakistan ha ka Sngi Ba-ar jong ka taïew ba la lah.
Kumta, la ong ba kitei ki paidbah ki la rah ia ki jingthoh bapher bapher ban pynpaw ia ka jingpyrshah bad ka jingpynrem jur jong ki halor katei ka jingjia thombor bad ki la pynrem jur ruh ia ka Pakistan, ha kaba ki la rah pat ruh ia ka lama India bad ki dawa ia ka hok jong kitei ki 26 ngut kiba shah pyniap dusmon ha katei ka jingjia.
Kumjuh ruh ka jingiadei kam hapdeng jong ka India bad ka Pakistan ka la sniewdur lut naduh ka jingleit thombor jong katei ka kynhun lehnoh Lashkar-e-Taiba ia ki paidbah ha katei ka jingjia ha Pahalgam. Namar la ong ba kane ka jingjia thombor, ka long ruh kawei na ki jingshah thombor ba shyrkhei tam ia ki riew paidbah, ka bym ju kham jia koit wat ha ki por ba la leit. Kumta, napdeng jong kitei ki paidbah nong-iakhih na kitei ki ri bapher, la don ruh kiba rah ia ki jingthoh kiba ong ba ki long ryngkat bad ka India bad ba ka India ka dei ban ioh ia la ka jong ka hok.
Namar ki la ong ruh ba ka Pakistan ka ju don kti ha kiba bun ki kam thombor pyrshah ia ka India, kumba la long ha ka jingjia thombor ha Pulwama, 26/11 (Mum-bai) bad mynta pat sa kane ka jingjia thombor ha Pahalgam.
Namarkata, ki la pynpaw ruh ka jingpyrshah jur ia ka Pakistan, ym ba ki ibeiñ ia katei ka jaitbynriew hynrei ia ki kam thombor jong ka, na ka por- sha ka por.
