Shillong, Ïaïong 28
U kapten ka Shillong Lajong Football Club ha ka lympung ïalehkai I-League jong ka aïom ba la lah, u Hardy Cliff Nongbri u la mih noh na kane ka klob kaba la bat ïa ka nam lahduh ha ka Shillong Premier League 2024-25 na ka bynta ban leit ïasoh pat sha ka Nongkseh Sports Club ban ïalehkai ha ka First Division Football League ban pynïaid da ka Shillong Sports Association.
Kane ka la wan hadien ba utei u khlur ïalehkai ka Jylla u la wan ban soi ïa ka soskular ne ka Inter Club Transfer ha ka shlem treikam jong ka Shillong Sports Association ha ka Lah Sngi U Blei.
Haba pyrshang ban ïakren bad U Nongsaiñ Hima, u Hardy u la ïathuh ba kane ka jingmih noh jong u na ka Shillong Lajong ka dei hadien ba ka kontrak jong u ka la poi sha kaba kut. “Ha ka jingshisha nga kwah eh ban dang ïai sah bad ka Lajong, hynrei ka kontrak ka jong nga ka la kut. Te kumta ïa mynta ngan ïalehkai shwa na ka Nongkseh ha ka First Division bad hadien kane ngan sa peit ïa ka lawei ka ban wan.”
“Kumba nga la ïoh ban ïakren bad ki bor pynïaid, ka Nongkseh ka don ïa ka jingthmu kham shalor. Kaba nyngkong eh ka long ban ïoh rah ïa ka First Division, hadien ban pyrshang sa ha ka Shillong Premier League bad hadien pat ban leit shim bynta sa sha ka Second Division I-League ban pynïaid da ka All India Football Federation ha ki snem ki ban wan,” u la bynrap.
Une u khlur ïalehkai uba la bat kum u kapten ka SLFC la kumba lai snem ha ka I-League bad Second Division, u la pynpaw ïa ka jingangnud ban trei shitom lang da baroh khnang ban ïalam ïa ka Nongkseh ba kan kynjoh sha ka thong ha ka First Division.
Kumba ka paw u Hardy u dei u rangïalehkai uba la san na ka Shillong Lajong Football Club ha kaba u la ïoh ban ïashim bynta ha ka Shillong League ba la pynïaid da ka Shillong Sports Associa -tion. Hadien la kyntiew kyrdan ïa u ban ïalehkai noh ha ka I-League naduh u 2016 haduh 2019. Ha u snem ba bud u la leit ïalehkai na ka Southern Samity (2019-2020), Ryn-tih Sports Club (2020-2022) bad ka Bengaluru United (2022-2023), hynrei ha u snem 2023 u la wanphai biang sha ka Shillong Lajong bad ban ïalehkai haduh kaba kut jong ka aïom ba la lah.
