Shillong, Ïaïong 28
Ka Federation of Khasi Jaiñtia and Garo People (FKJGP) Sengkmie ka dap da ka jingsngewkhia kaba khraw bad ka pynrem jur halor ka jingkem ïa u samla Sandy Sohtun, President ka North Eastern Hills University Students Union (NEHUSU).
Ha ka kyrwoh khubor ba la pyllait da u Vice President ka FKJGP Sengkmie, Bah Kitboklang Nongphlang, u la ong kum ka seng ka la sakhi ïa ki kynrum-kynram kaba la mih ha ka skulbah NEHU hadien ba ka kynhun jong ki samla pule jong ka skulbah NEHU hapoh ka jingïalam jong u samla Sandy Sohtun ban sei madan ïa ki kam bamsap bad ki jingbym ïaid beit ïaid ryntih haduh ba la poi u pud ba ki samla pule jong ka skulbah NEHU kin pynlong ïa ka jingshah thngan kaba khlem buh por ban dawa weng kam mardor ïa u Vice Chancellor. Ka jingshim sting jong ka Sorkar Jylla ban tuklar ïa katei ka kam haduh mynta mynne ka dang pyndkoh ïa kiba bun ki rukom treikam ha ka skulbah NEHU.
Ka FKJGP ka sngew ba ka jingshah pharep jong u samla Sandy Sohtun, President ka North Eastern Hills University Students Union (NEHUSU) lyngba jong uwei u Nonghikai jong katei ka skulbah ka lah ban don kaei-re-kaei kaba sha lyndet ban set da u kak na ka shyntur jong ki samla pule ban dawa ïa la ka jong ka hok ban saiñdur ruh na ka bynta ka jingïaid shaphrang jong katei ka skulbah.
Ka jingrung jubor jong ki bor pulit hapoh ka campus jong ka skulbah NEHU ha ka jaka ba kan long ka jingshngaiñ, kan long pynban kum ka jingpyntieng pynsmiej ïa ki samla pule jong katei ka skulbah. Ka Sorkar ka dei ban shimkhia mardor ïa katei ka kam ban teh lakam bad ban thung da ka kynhun tohkit ka bym noh shiliang khmat khnang ba ki jingshisha kin paw pyrthei.Utei u nongïalam ka seng u la ong, kum ka seng na ka por sha ka por ka la ju ïoh ïa shibun ki jingujor halor ka jingshah ñiewbeiñ bad shah leh shiliang khmat ym tang ïa ki samla pule hynrei wat ïa ki nongtrei ha katei ka skulbah kiba la wan jia ha ki dur bula ki bapher bapher lyngba ka jingngeit niam bapher bapher bad kumta ter ter. Kumta na ka liang jong ka FKJGP ka maham jur ïa ki bor kiba nabar ba kim dei satia ban pyrshang ban ïalam bakla bad ban balia siang sdieh da kaba pyrshang ban tap eitmiaw ïa ki kam ba uta u Vice Chancellor u la leh ban pynjah burom ïa ka NEHU ha kaba ki samla pule bad wat ki nongtrei kiba don ha ka skulbah NEHU kim mon shuh ïa u ban dang long kum uta u khliehduh ban pynïaid ïa kiei-kiei baroh.
Kyntang ïawai, ka FKJGP ka kren da kaba shai ba kan sa tih tyllong ïa kiei-kiei baroh bad kan ym shong kli-kti satia halor ki jinglong jingman jong ka skulbah NEHU bad kum ka seng kan ym ailad ba ki samla trai ri kin shu kylla long ki ‘langkñia tang na ka bynta ka jingmyntoi jong ki briew kiba nabar kiba don bynta ha ka saiñ pyrthei jong ka ri India ba ïar.
