Nongstoiñ, Ïaïong 28
Ka kynhun ïalehkai jong ka Ladnongsba SC ka la ïoh rung sha ka final ka First Division jong ka NDSA Premier League Football Tournament 2024-25 ba la pynlong da ka Nongstoiñ District Sports Association.
Katei ka jingïoh rung jong ka Ladnongsba SC sha ka final ka la wan hadien ba ka la ïoh jingjop da kaba lah ban pynliem noh da 3-1 kol ïa ka Nongkhlaw SC ha ka jingïalehkai semi final kaba la long ha ka sngi Saitjaiñ ha madan New Nongstoiñ.
Ka jingïalehkai ha kane ka sngi ka la long shisha ka jingïalehkai kaba itynnad, namar ka jingïalehkai bha na baroh ar tylli ki kynhun. Kumta ka Nongkhlaw ka la mat ïa ka jingshah rem, katba ka Ladnongsba SC ka la ïoh ban khur ïa ka jingjop.
Ïa ki lai tylli ki kol jong ka Ladnongsba la thep da u Rishai Nongtnger ha ka minit kaba 45 & 71 bad u Dawanpyndap Pathaw ha ka minit kaba 79, katba ïa ka shikol jong ka Nongkhlaw la ïoh ban thep da u Raian Thongni ha ka minit kaba 60.
Na ka liang ka Football Committee jong ka NDSA ka la pyntip ba ka jingïalehkai final jong ka kyrdan First Division kan long ha ka 3 tarik u Jymmang ha kaba ka Ladnongsba SC kan ïakhun pyrshah ïa ka Nongpyndeng SS &CC ha ka por 2 baje janmiet ha madan New Nongstoiñ.
