Shillong, Ïaïong 28
U President ka North Eastern Hill University Student’s Union (NEHU-SU), samla Sandy Sohtun u la shah kem noh ha ki bor pulit ka East Khasi Hills District ha ka 28 tarik u Ïaïong, 2025 hadien ba la kynnoh ba u la donkti ban shoh ïa u nonghikai jong ka sobjek Hindi jong ka Skulbah North Eastern Hill University (NEHU), Dr. Alok Singh.
Kane ka jingshah kem jong une u samla ka dei hadien ka ejahar ba la mudui da u Dr. Alok Singh ha ka 25 tarik u Ïaïong, 2025 hadien ba ka la mih ka jingkynnoh ba utei u samla ryngkat bad san ngut kiwei pat ki la donkti ha ka ban shoh bad pynmynsaw ïa utei u nonghikai ha ka 24 tarik u Ïaïong, 2025 da kaba ki la rung jubor hapoh ka kamra treikam jong utei u nonghikai bad ki la shoh bad dat ïa u.
Shuh-shuh, ka la mih ruh ka jingkynnoh ba kitei ki samla ki la pynap da ka khanshi na ryndang jong utei u nonghikai ryngkat ka byrngem byrsit ïa u.
Na ka liang u Dr. Alok Singh u la ïathuh ruh ba na ka liang jong kitei ki samla ki la kynnoh ba u la leh politik hynrei na ka liang jong u, u la kyntait ïa katei ka jingkynnoh.
Hadien ba la kem ïa u President ka NEHUSU, na ka liang ki bor pulit ka East Khasi Hills ki la rah noh ïa u sha ka ïingkashari jong ka District and Sessions Judge ha Shillong ban tiañ bishar ïa u hadien ba la dep ban leh ïa ka Medical Check-up ha Shillong Civil Hospital.
La sakhi ruh ba ha kane ka jingrah ban tiañ bishar ïa u samla Sandy Sohtun ha ïingkashari jong ka District Court, la synran lang ïa une u samla da ki dkhot jong ka Khasi Student’s Union (KSU) ha ryngkat ka jingmih ka sur pyrta pyneh rngiew da ka seng.
Na ka liang ka ïingkashari jong ka District and Session Judge ka East Khasi Hills ka la hukum ban set hynñiew sngi ïa utei u President jong ka NEHUSU ha Judicial Custody.
