Shillong, Ïaïong 28
Ki runar bym lah ban ithuh, ki la ïoh ban tuh ïa ki san tylli ki shaka bad ruh ki alloy rim kiba shongdor da ki phew hajar tyngka.
Katkum ka khubor na ki pulit la ong ba u Bah Damewan Lawai u la ai ka jingujor ba ha ka miet jong ka 25 tarik mynta u bnai, ki runar bym lah ban ithuh, ki la tuh ïa ki san tylli ki shaka ryngkat bad ki alloy rim na ka kali Maruti Alto ka jong u, kiba shongdor kumba T.35 hajar, na Pomlahier Main Road ha East Khasi Hills.
Ha kaba ïadei bad kane, na ka liang jong ki pulit ki dang pynlong ïa ka jingtohkit ban lap ïa ki jingshisha bad ban thwet ruh ïa ki runar kiba donkti ha kane ka kam.
