Shillong, Ïaïong 28
Ka Riïohlang Dhar ka la shah pynrung kyrteng ha ka thup jong ki nongpynïaid rephri ha ka semifinal bad final jong ka AFC Women’s Champions League 2024-25 ka ban long ha u bnai ban wan bad ban long ruh ka nong India kaba nyngkong eh ban ïoh ïa la lad ban don bynta ha katei ka lympung.
Katei ka samla kaba na kane ka Jylla ka la long napdeng 8 ngut ki assistant referee ban ïoh don bynta ha ki lai tylli jingïalehkai.
Baroh ar tylli ki semi-final bad ka final kin long ha Wuhan kaba ha China, ha kaba ka semi kan long ha ka 21 tarik u Jymmang bad ka jingïakhun ban ïaknieh ïa ka nam lahduh kan long ha ka 24 tarik.
Ka Riïoh (FIFA-level assistant referee), ka la long kum nongpynïaid ha kiba bun ki jingïalehkai bar ri ha ki snem ba la leit. Ka la long kaba ar napdeng ki nong India ha ka FIFA U-17 Women’s World Cup jong u snem ba la lah kaba la long ha Dominican Republic. Ha u snem 2024 ka Riïoh kaba dei ka pulit ka Jylla, ka la shah thung ban pynïaid ïa ka lympung ïalehkai AFC U-17 Women’s Asian Cup kaba la long ha Indonesia.
