Shillong, Ïaïong 29
Ka jingïaid lynti jong ka kynhun ïalehkai ka Jylla ha ka 1st Little Masters Trophy 2025 ka la poi sha kaba kut na ka daw ka jingshah pynthut ha ki bor ka mariang ha ka jingïakhun semifinal pyrshah ïa ka Tripura ha ka sngi Ba-ar.
Kane ka jia ruh ha kawei pat ka jingïakhun semi final hapdeng ka Assam bad ka Manipur.
Ha ka jingshisha baroh ar tylli ki jingïalehkai la dei ban pynlong hynnin ka lah sngi U Blei bad hadien kata la pynkynriah noh sha ka sngi Ba-ar. Hynrei ym shym lah pat ban pynlong ïa ka jingïalehkai.
Ha kane ka jingkylla ka mariang, ka organising committee jong ka U-14 boys’ tournament, kaba la pynlong hapoh ka jingpeit jong ka Assam Cricket Association ha Guwahati, ka la rai ba ka Assam bad ka Tripura (kiba la wan ha ki kyrdan ba hakhlieh duh ha baroh ar tylli ki group) ki la jam sha ka phainal ka ban long ha ka sngi Balang. La ong ruh lada jia ba ym lah ban pynïalehkai ha kane ka sngi ïa ki ar tylli ki kynhun yn rai jop ïa baroh ar (joint winners).
Lah ban kdew ka Meghalaya ka la jop arsien ha ka Group-A, nyngkong pyrshah ïa ka Mizoram da 47 ron bad hadien pat ïa ka Arunachal Pradesh da 7 wiket. Hynrei ka la mad ruh ïa kawei ka jingshah rem ha ka Assam da 9 wiket.
