New Delhi, Ïaïong 29
U Myntri Rangbahduh ka ri, Narendra Modi, u la ai ïa ki shipai ‘ka jinglaitluid kaba pura ban rai ïa ka rukom, ki thong, bad ka por’ jong ka jingïakhun ki shipai ka India halor ka jingthombor jong ki lehnoh ha Pahalgam.
Ïa kane ka rai la shim ha ka por ba u Myntri Rangbahduh ka ri u la ïakynduh ïa u Myntri Ïada ri u Rajnath Singh, u nongai buit ka tnat ïada ri u Ajit Doval, bad u heh duh ka tnat Pohïing u General Anil Chauhan.
Ki tyllong khubor ki la ong ba u Myntri Rangbahduh u la pynskhem biang ba ka dei ka jingkut jingmut jong ka ri ban ïakhun pyrshah ïa ka jingshah pynshitom beiñ ha ki kam lehnoh’ bad ba u don ‘ka jingngeit bad jingshaniah kaba pura’ ha ki shipai India. Kham hadien ka jingïalang, u Amit Shah, Myntri Kam Pohïing bad u Mohan Bhagwat, uba dei u heh duh jong ka Rashtriya Swayamsevak Sangh, uba long u nongpynïaid jingmut jong ka BJP, ki la poi sha ka ïing sah jong u Myntri Rangbahduh ka ri.
Ka tyllong khubor ka la batai ba ka khubor na u Myntri Rangbahduh, ka long ba la ailad ïa ki shipai ban shim rai pyrshah ïa ki lehnoh kiba la pynïap ïa ki 26 ngut ki briew, kiba bun ki riew paidbah, ha ka jingjia kaba shyrkhei tam naduh ka jingshah thombor ha Pulwama ha u bnai Rymphang 2019. Hadien kane, ka India ka la pynlong ïa ki jinghiar thma liengsuiñ ïa ki ktem lehnoh ha Balakot ha Pakistan. Ïa kine ki ktem la pynïaid da ka kynhun lehnoh Jaish-e-Mohammed ryngkat ka jingïarap jong ki shipai Pakistan.
Tang hadien hynriew snem pat, la wan jia biang kum kane ka jingjia, ha kaba ka seng lehnoh ba la tip kum ka Lashkar-e-Taiba kaba la pynïadei bad kane ka jingthombor, kaba la kam ïa ka jingkitkhlieh. Ha kawei pat ka liang, ki tnat pahara ki la ong ruh ba ki sakhi kiba don ki kdew sha ka Pakistan biang. Ha kaba ïadei bad kane la pyntip ruh sha ki diplomat na US, Russia, China, Japan, bad katto katne ki ri ka dewbah Europe.
Ka Sorkar ka la dep ban pyntreikam ïa ki kyndon khang pyrshah ïa ka Pakistan. Ki plan haduh mynta na ka India ki long ba la pynsangeh ïa ki Visa, pynsangeh ïa ka um. Ha ka jingkynthoh kaba nyngkong ka Delhi ka la weng noh ïa ki Visa na ka bynta ki nong Pakistan, lait noh tang ïa ki Pak Hindu bad kiba don ïa ka jingmynjur ban sah slem. Ka Sorkar ka la weng noh ruh ïa ki visa wan shah sumar pang.
Baroh ki Notified Visa ba la ai sha ki nong Pakistan, ki la kut noh ha ka Sngi U Blei, 27 tarik u Ïaïong, kaba la pynlong ïa ki nongshong shnong jong ka Pakistan ban leit ïeng laiñ ha ki jaka rung khappud, kynthup ruh ha ka jaka talasi ba pawnam jong ka Attari-Wagah.
Naduh ka sngi Palei, ha kaba la pynmih nyngkong ïa katei ka hukum pyndam, haduh 1,000 ngut ki nong Pakistan, ki la mih noh na India, ha kaba u Myntri Kam Pohïing u Amit Shah, u la kren hi dalade sha ki Myntri Rangbah, ba kin pyntreikam ïa katei ka hukum.
Kum shi bynta ban khang pyrshah shuh shuh ïa ka Pakistan, ka India ka la pynsangeh ruh ïa ka jingïateh soskular jong ka Indus Waters Treaty, ka jingïateh soskular kaba kongsan bha ban ïasam um kaba ai ïa ka Pakistan haduh 85 persen na ka jingpynbiang jong ka.
Ka jingpynsangeh ïa ka IWT, kaba la ïasoi ha u snem 1960, ka la pynbitar hi lep ïa ka Pakistan, kaba la khot ïa ka ba ka dei thik kumba hiar thma. Kumta halor kane, ka Islamabad ruh naduh katei ka por ka la weng noh ïa baroh ki visa jong ki nong India bad ka la pynphai noh da ki spah ngut.
Ka Pakistan ruh ka la weng noh ïa ki visa bad la pynsangeh ruh ïa kiwei pat ki jingïateh hapdeng ki arliang mamla, kum ka soskular Simla, ha ka jingsangeh bad naduh kata ka por u heh jong ka tnat ïada ri ka Pakistan u la maham ïa ka thma kaba lah ban jia bad ka India.
Ha ka jingkynthoh sha ka lad pathai khubor jong ka Pakistan, ka Geo News – ka youtube channel kaba la shah khang ha India, u Myntri Korbar Ri, u Khawaja Muhammad Asif, u la pynpaw ba ki sngi ban wan, kin long kiba kongsan bha.
Ha kawei na ki jingkren paidbah ba nyngkong eh jong u halor ka jingshah thombor ha Pahalgam, u Myntri Rangbahduh u la kular ban siew kylliang bad ong ba ka Sorkar jong u kan ym ailad ïa ki kam lehnoh ban jop.
