Jowai, Ïaïong 29
Ka Lion Sports & Youth Affair ka la jop da 10 wiket ïa ka Evergreen S.C & C.C ha ka lympung ïalehkai District Cricket League 2025 ba la pynïaid da ka West Jaiñtia Hills District Cricket Association ha ka sngi Ba-ar.
Ha kane ka jingïakhun, ka Lion Sports & Youth Affair ka la jop kynting pisa bad ailad shwa ïa ka Evergreen ban tied nyngkong ha kaba ka la ïoh tang 70 run bad shah pynhap 9 wiket ha ki 16 over. U Riki Synrem u la tied 22 run na 21 bol ryngkat 4 tylli ki ‘four’. Katba u Deibormi Rangad nongkawang bol jong ka Lion Sports & Youth Affair u la shim 4 wiket ha ki 6 over.
Haba wan shimti ïa ka pali ba ar, ka Lion Sports & Youth Affair ka la kynjoh sha ka thong da kaba ka la lah ban tied 71 run bad khlem shah pynhap wat tang shi wiket ruh ha ki 6.1 over. U Firstbornson Dkhar uba la kham leh bha u la ïoh 53 run na 25 bol ryngkat 5 tylli ki ‘six’ bad 3 tylli ki ‘four’ lem bad u Kitboklang Rangad uba ïoh 11 run na 13 bol ryngkat 2 tylli ki ‘four’. Te kumta u Deibormi Rangad u la ïohpdiang ïa ka nam Man of the Match.
Ka jingïalehkai ha ka sngi Balang kan long hapdeng ka Khliehtyshi SC pyrshah ïa ka Moodymmai S.C ha ka por 9 baje mynstep.
