Shillong, Ïaïong 29
Ka Hynñiewtrep Youth Development Council (HYDC) ha ka Sngi Ba-ar ka la leit ïakynduh ïa u Principal Secretary ka tnad Labour halor ka mat ba ïadei bad ka jingpynkiew bainong ïa ki nongtrei bylla hapoh ka Jylla katkum ka ‘Minimum Wage’.
“Ha ka jingïakynduh bad u mynne, ngi la buh ka jingkylli ba yn leh kumno lada kine ki karkhana, ki dukan heh kiba ai bylla ïa ki trai-ri trai-muluk kim lah ban siew ïa ka ‘Minimum Wage’…la ka tnad kan pynshitom ne kumno. Ka khubor na u Principal Secretary ka long ba lada kine ki karkhana bad ki kynhun khaïi kim lah ban siew bainong kumba la buh da ka Sorkar Jylla, kata, kito ki nongtrei bad u nongaikam kin hap ban ïashong ban ïapynbeit…bad lada ym lah ban pynbeit, yn leit pat sha ïingbishar,” ong u President ka HYDC, Bah Wyraiwan Sohtun haba kren sha ki lad pathai khubor.
U la buh jingkylli ruh ïa ka Sorkar ba kan myntoi aïu ban shna ïa kane ka aiñ (Minimum Wages) – ban pynkiew tulop ïa ki nongtrei bylla khlem da lah pat ban pyntreikam ïa ka ha madan.
“Ngim i don jingmut ïa kane ka aiñ kaba la shna da ka Sorkar Jylla bad ngi ong ba lada ym lah, ka bha ba nai shna hi ïa kane ka aiñ namar ngi ïohi ba ka dei tang ka aiñ ka ban shu pynthame ïa ki paid nongshong shnong ka Jylla ne kiba kham halor ban pyni ba ka Jylla ka la shna ïa kane ka aiñ bad ba ki nongtrei bylla hapoh ka Jylla ki ïoh katkum kane. Ha ka jingshisha pat, ki nongbylla kiba don hapoh ka Jylla kim ïoh satia ïa kane ka bainong ba la buh da ka Sorkar Jylla,” u la ong.
Haba pynsngew ba ka seng ka la buddien la 3-4 bnai ïa kane ka kam, u President u la ong ba hadien ba ïakynduh ïa u Principal Secretary ka tnad Labour la ïohi shai ba kane ka aiñ ka dei beit tang ka aiñ kaba don ha ka kot sada hynrei khlem treikam.
Shuh shuh haba kdew ba kane ka aiñ kan ym pat urlong kat bym pat ïa mih paidbah ban pynbor ïa ka Sorkar ba dei ban pynshitom ïa ki kito ki bym lah ban siew ïa kane ka bainong ba la buh da ka Sorkar, u Bah Sohtun u la ong ba ka seng shen kan sa lum ïa ka jingïalang paidbah ha Motphran ban pynsngewthuh paidbah ba kane ka dei ka hok u paidbah, bad ka dei ka kamram jong u nongbylla, ki paidbah, bad kum ki kynhun seng kumjuh ban pynbor ïa ka Sorkar ban pyntreikam bad phah pynshitom ïa kino-kino kiba pynkheiñ ïa kane ka aiñ.
