Shillong, Ïaïong 29
Ka jingwanrah ban pynlong ïa ka jingai jinghikai ban lehkai chess hapoh ki skul lane ka ‘Chess in School Program’ ka la long ka jingmyntoi kaba khraw ïa ki khynnah ba kin don ïa ka bor pyrkhat pyrdaiñ ha kane ka jingïalehkai ha ryngkat ki jingpule jong ki.
Ïa kane ka prokram la pynlong da ka State Council of Science Technology & Environment (SCSTE) ha kylleng ki district jong ka Jylla na ka bynta ban sei ïa ki khynnah ïalehkai kiba don ïa ka sap kaba kyrpang ha kane ka jingïalehkai bad ba kin lait na ki jingpynmlien ban pynlut por than tang ha ki mobile phone.
Haba pyrshang ban ïakren bad katto-katne ki khynnah skul kiba na ka thaiñ Mawngap ki la pynpaw ba ki la ïoh shibun ki jingmyntoi lyngba ka jingpynlong ïa kane ka jingai jinghikai hapoh ki skul bapher bapher lyngba ka jingshim khia jong u General Secretary ka East Khasi Hills District Chess Association u Bah Rijied Katrai ban ïaid kylleng ki skul kiba na katei ka thaiñ ban ai jinghikai ïa ki khynnah.
“Ka long ka jingkmen kaba khraw ïa ngi ki khynnah skul ba ym dei ban ngi nang tang ïa ka kol, hynrei ngi nang ruh ha ka jinglehkai chess khang ba ngin kiew ha ka jingim jong ngi. Kane ka dei ka jingtrei shitom jong i Sir iba la wan sha ka skul ka jong ngi ban ai jinghikai ha ka jinglehkai chess mynta u snem,” la pynpaw ka Japhidarihun Giri Kharshiing kaba dei ka khynnah skul jong ka Seng Khasi Mawphlang.
“Ka chess ka long ka jingïarap ban kyntiew ha ki jingmut jingpyrkhat jong ngi ba ngin long kiba shalak bad ka ïarap ruh ban nangkiew ha kane ka jingïalehkai.”
Ha kawei pat ka liang ka Rishtag G. Momin na ka skul St. Paul HSS ka la pynpaw ba la ju pynlong ïa ka jingai jinghikai ban lehkai chess manla ka sngi Ba-ar hapoh skul jong ka bad kane ka la long ka jingïarap kaba khraw ïa ki khynnah ban sngewthuh shaphang kane ka jinglehkai. “Ha ka skul jong ngi ka don ka chess club kaba la ju pynlong ban hikai ban ïalehkai chess manla ka sngi Ba-ar. Te kumta nga da sngewkmen eh ba nga la ïoh shibun ki jingmyntoi ha kane ka jingïalehkai.”
Dang ha ka taïew ba la lah ka SCSTE ka la kyrshan ïa ka Mawngap District Christian Multi-purpose Higher Secon-dary School ha ryngkat ka East Khasi Hills District Chess Associa-tion ban pynlong ïa ka lympung ïalehkai chess ba la tip kum ka Maw-phlang Block School Chess Tournament 2025 ha kaba ki la don haduh 215 ngut ki khynnah na 11 tylli ki skul kiba hap ka Mawphlang Block ban wan shim bynta shitrhem ha kaba ka la long ka jingmyntoi kaba khraw na ka bynta ki khynnah katei ka thaiñ.
Te kumta kitei ki khynnah ki la pynpaw ïa ka jingkhmih lynti ba kin dang ïai trei shitom nangne shakhmat shwa ba kin leit shim bynta sha ka State Level Chess Championship ka ban sa long shen namar ka jingangnud ka jong ki ka long ba kin poi wat shaduh ki lympung ïalehkai national ki ban long ha kylleng jong ka ri India.
