Nongpoh, Ïaïong 29
Uwei u rangbah ba la tip kyrteng kum u Nabin Singh, 41 snem ka rta na ka shnong Mukhla, u la duh noh ïa la ka jingim hadien ba u la sied na ka jingkhang kali kaba u shong bad hap nalor shapoh na ka jingkieng ‘flyover’ kaba don ha Umïam kat haduh u la mynsaw jur na ka bynta jong ka khlieh.
Katkum ka tyllong khubor ba la ïoh lum na ki bor pulit, la ïathuh ba ha ka sngi Ba-ar ha ka por kumba 2:35 eiei, ka la don kawei ka kali Maruti Wagon R kaba don ïa u registration number ML05-AC-5114 kaba dang wan na ki thaiñ Umroi ban hiar sha ka nongbah Guwahati kaba la pynher sted bha bad utei u Nabin Singh, u la shong halor ka jingkhang kali kaba la ñiah da u Govinda Biswas na ka jylla Assam.
La ïathuh ruh ba namar ka jingpynher sted kaba palat, jong katei ka kali, ka la leit tynrah ïa ka jingker kynroh jong katei ka jingkieng, kaba la pynlong ïa utei u Nabin Singh ban sied najrong ka kali bad hap shapoh na ka jingkieng flyover. La ïathuh ba ar ngut kiwei pat kiba shong hapoh katei ka kali ba kynthup ïa u Bijoy Singh, para jong u Nabin Singh lem bad u Baris Marboh na ka shnong Puriang ruh ki la ngat ha ka jingmynsaw na katei ka jingjia.
Na ka liang jong ki bor pulit ki la pyntip ruh ba ïa kitei kiba mynsaw la pynkit noh sha Nongpoh Civil Hospital, bad na ka liang ki doktor ki la pyntip ba u Nabin Singh u la dep khlad lypa shwa ban poi. Na ka liang ki pulit ki la tan noh ïa katei ka kali sha thanad Umiam bad ka jingtohkit halor kane ka jingjia ka dang ïaid shakhmat.
