South Korea, Iaiong:
Uwei u khynnah skul u la pynmynsaw bad dung tari ia 3 ngut ki khynnah skul ha kawei ka skul ha South Korea ha ka step Sngi Nyngkong bad 2 ngut kiwei pat ki dei kiba shu kum ngat bad mynsaw malu-mala.
Kane ka la jia ha ka por kumba 8:36 baje jong katei sngi ha katei ka skul kaba don ha Cheongju, kumba 110 Kilometre lane 70 miles na Shathie jong ka nongbah Seoul.
Ki pulit ha katei ka step ki la ioh jingtip halor ka kam thombor kaba la jia ha ka kamra klas jong katei ka skul, ha kaba utei u khynnah u la dung pynmynsaw ia kitei ki khynnah bad nonghikai kiba don ha katei ka jaka.
Ha katei ka jingjia, 3 ngut ki la mynsaw jur bha, kynthup ia u headmaster jong katei ka skul, uba la shah dung tari na ki bynta jong ka kpoh bad kumjuh ruh uwei u nongtrei sorkar uba la shah dung tari na ki bynta jong ka shadem.
Ki pulit ki iathuh ruh ba don sa kiwei pat ki 2 ngut kiba la ngat lang ha katei ka jingjia hynrei kiba shu mynsaw tang khyndiat.
La ong ba utei u khynnah u la pyrshang ban phet krad noh pat sha kawei ka jaka ba marjan, ha kaba u la kynthih noh sha ka um kaba don ha ka jaka shangkai pynngad kaba don hajan jong katei ka skul. Hynrei, tang hadien 12 minit, ki pulit ki la bud-dien bad thwet shitom ban ioh kem ia u bad ki la ioh kem noh ruh ia u tang ha i por iba khyndiat.
Ia utei u khynnah 18 snem la pynkit noh sha ka jaka sumar namar u la don ia katto katne ki jingmynsaw bad ki pulit ki dang pyrshang ban iakren bad tohkit ia u, ban lap ia ka daw jong katei ka jingleh thombor jong u ha katei ka jingjia.
Kane ka khubor ka long ruh tang hadien katto katne bnai ba uwei u nonghikai u la dung iap ia uwei u khynnah rit ba dang 8 snem ha kawei ka skul hapoh North Korea hi.
Wat la katta, la ong ba ka South Korea, ka dang bat hi ia ka nam jong ka ri kaba shngaiñ, ha kaba ki don tang 1.3% kum kine ki jingjia bad kumba 1,00,000 ngut ki briew kiba shah pyniap hapoh jong u snem 2021, katkum ka jingbuh jingkheiñ bad jingbishar bniah jong ka tnat ba dei khmih.
