Khliehriat, Ïaïong 29
Ban kyntiew ïa ka sap ka phong bad ban pynshlur ïa ki samla ban ïashim bynta ha ki kam ïalehkai, u Myntri ka Sorkar Jylla, Bah Kyrmen Shylla ha ka Sngi Ba-ar u la plie ïa ka madan Futsal ba la kyrshan da ka District Mineral Fundage ha shnong Sohkymphor kaba hap hapoh ka Wapung C&RD Block.
Nalor u Myntri la ïadonlang ruh u Deputy Commissioner ka East Jaiñtia Hills District, u Shivansh Awasthi, u Deputy CEM ka JHADC, Bah Lasky Rymbai, u Deputy Chairman ka JHA -DC, Bah Wailadameshwa Siangshai nalor kiwei kiwei.
Haba kren ha kane ka jingïalang, u Bah Kyrmen u la ai khublei ïa baroh ki nongshim bynta kiba la pynlong ïa kane ka projek kaba jop da kaba pynpaw ïa ka jingdonkam jong ka jingïalehkai ha kane ka juk mynta. U la ban jur ruh halor ka jingdonkam ban pynbiang shuh shuh ïa ki lad jingïalehkai ha ka distrik ki ban plie lad ïa ki samla ban ïashim bynta ha ki kam ïalehkai.
U Bah Shylla u la don ruh ka jingkyrmen ba lyngba ka jingplie ïa ka madan ïalehkai Futsal ha ka shnong Sohkymphor kan pynshlur shuh shuh ïa ki nongïalehkai bad ban pynjanai shuh shuh ïa la ka sap.
U la pyntip ruh ba yn sa shna shuh shuh ïa ki madan ïalehkai futsal hapoh ka district lyngba ka DMF na ka bynta ka jingmyntoi jong ki samla ka district.
Na ka liang u DC ka East Jaiñtia Hills, Shi-vansh Awasthi, u la ban jur ïa ka jingdonkam ban pynneh pynsah ïa ki jingtei thymmai khnang ban pynthikna ïa ka jingmyntoi kaba neh slem.
