Shillong, Ïaïong 29
Ki nongshong die jingdie ha Ïewduh ki la ïathuh ba ha ka 28 tarik u Ïaïong, 2025, ki dukan ha Ïewduh ki la khang lut baroh bad kam don kano-kano ka jingïadie-jingïathied. Ki la ong ruh ba kim sngewïahap satia ban don mano-re-mano ban phah khang ïa ki dukan khlem ka jingpynbna na ka liang ka Sorkar ne na ka liang ka ophis treikam jong ka Hima Mylliem.
Ki nongshong ïew ki la ong ruh ba kane baroh ka dei na ka jingngeit biej bad kam don shuh ka jingshaniah halade bad ba ki la shah synshar ha ki nongwei-nongar namar haba shu ïohsngew ïa ka khubor hamsaïa na shane-shatai ban khang ka ïew khlem kano-kano ka jingthoh na ka Sorkar ne ka jingpynbna na u Syiem ka Hima Mylliem, ki nongshong ïew ki la khang lut ïa la ki dukan bad kane ka long kaei-kaei ka bym ïahap satia ban shu khang ïa ki dukan da kaba ong ba lehse ba kane ka dei ka daw nalade shimet hi ban khang ïa ki dukan.
Haba kylli, ki nongshong ïew ki la ïathuh ba kim da tip bha ïa kata ka kynhun hynrei ki la shu ïohsngew ïa ka jingïakren shane-shatai bad ka khubor hamsaïa ba kan don ka jingkhang ïa ki dukan bad ïa ki ïew-ki hat.
“Katkum ka jingsngewthuh jong ngi kat ban khang ïa ka ïew-ka hat khlem da ïoh ïa ka jingbit kaba biang, ym dei ban khang namar kane ka ktah ïa ki babun balang”, ong ki nongshong ïew.
Ki nongshong ïew ki la ïathuh ruh ba ki don tang katto-katne tylli ki dukan kiba la plie ha katei ka sngi hynrei na ka daw ba kiba bun ki nongshong ïew kim don bad ba ki dukan kiba bun ki la khang lut, kumta kim banse ban leit phai noh sha la ïing.
Shuh-shuh, kitei ki nongshong ïew ki la ong ba haba khang ka ïew, ka don ka jingduhnong kaba khraw bha khamtam ïa kito kiba ju kamai mynsngi bad bam da miet bad ka don ruh ka jingktah haba ïadei bad ki mar-ki mata kiba hap ban bret lut namarba ki la pyut.
“Ka don hi ka jingktah ha ka ïew-ka hat haba ngi khang, ka don ka bynta ba ngin sngewlem bad ngi dei ban sngewlem pat da kawei ka bynta ban pynpaw ym ban da phah khang syndon ïa ka ïew-ka hat. U don u pud ba ngi hap ban ïasnohkti lang kiba lah ban ktah ïa ka ïap-ka im jong ka jaidbynriew, kata keiñ ka dei kaba kongsan hynrei lada ngi kwah ban ïasnohkti lang haba ïadei bad kita ki jait kam, ngi hap ban da sngewthuh jingmut bad ban pyrkhat jngai shwa bad ba ngim dei ban shu bamja khluit ban kohnguh ïa kata ka jingmih ka jingong ban shu khang noh ïa ka ïew”, ong kitei ki nongshong ïew.
Haba kylli la ki sngewïahap ne em halor ka jingkhot ban phah khang ïa ki dukan ban pynpaw ïa ka jingsngewlem halor ka jingshah siat ïap ki riew paidbah ha Pahalgam kaba don ha Jammu & Kashmir ha ki kynhun lehnoh, ki nongshong ïew ki la jubab ba ki don ïa ka mynsiem sngewlem na ka bynta ki para mynsiem hynrei kim sngewïahap pat ban khang ïa ka ïew namar kane ka ktah shikatdei eh ïa kiba im ban bylla sngi ha ïew.
“Ngi dei ban sngewlem para mynsiem hynrei kaba kongsan eh ka dei ban da ïaid lyngba ka lynti kaba dei da ka jingsngewthuh shwa ba ngi lah ne em ban khang ïa ka ïew-ka hat namar kiba bun ki dang dei kiba hap ban im da kaba bylla sngi bad kiba hap ban trei, ban ktah bad ban im bai sngi napoh ka ïew”, ong kitei ki nongshong ïew.
