Shillong, Ïaïong 29
Ka Jaiñtia Student Union (JSU) Sengkmie ka la pynrem jur halor ka jingshah kem u samla Sandy Sohtun uba dei u President jong ka NEHUSU. Ka seng ka la ïohi ïa ki kynrum-kynram kiba don katei ka jaka pule naduh mynshem snem kat haduh ba ki samla pule ka NEHU kin hap ban shah thngan hapoh ka jingïalam ka NEHUSU ban dawa ban weng noh ïa u Vice Chancellor ka skulbah u Prof. P.S Shukla.
Katba dang ïaid ki sngi ka seng ka sakhi ba ki kynrum-kynram hapoh ka skulbah NEHU ki dang paw pyrthei bad ka jingpharep ïa u samla Sandy Sohtun, da uwei na ki nonghikai jong kane ka skulbah, lah ban don eiei sha lyndet bad ym lah ban pdiang satia.
Ka nam bad ka burom jong ka skulbah NEHU ka la dang hiar katba dang mih ki sngi. Yn ym lah ban klet ba shisien ka sngi kane ka skulbah, kala pynmih ki riew khraw na kane ka thaiñ bad mynta pat hap ban kem ïa ki samla pule tang na ka daw ba ki dawa ïa ka hok jong ki na ka bynta ka lawei kane ka skulbah. Ka Sorkar ka dei ban shimkhia ban tuklar halor kane ka kam bad ban thung noh syndon da ka ‘Independent Inquiry’ khnang ban don ka jingbishar kaba khuid.
Ka jingwan rung ki bor pulit hapoh campus ka la nang pyntieng pynsmiej ïa ki samla pule bad kan pynthut shuh shuh ïa ki kam kane ka skulbah. Ka Sorkar ka dei ban weng noh mardor ïa ki bor pulit kiba don hapoh ka campus khnang ba kan ym pynthut ïa ka jingtreikam ka NEHU.
Ka seng ha kawei ka bynta ka sngewphylla ban ïohi ba ki pyrton jong ki pulit ba la phah da ka Sorkar ha kane ka jaka pule. Ka seng ka kyntu ïa ka Sorkar ba ha ka jaka ban phah pulit shapoh campus NEHU kan bha ba kin phah noh ïa ki pyrton ki pulit sha ki shnong khappud (Border Areas) kiba don kam palat ka jingïada na ki mynder ri. Ki briew kiba shong ha khappud ruh kin shngaiñ lada ki pulit pahara ki bun.
Ka seng ka phah ïa ka jingkyrshan ba pura ïa ka NEHUSU bad ka ngeit skhem ba ka hok jong ki samla pule kan khie rasong, la pynkut ka kyrwoh ba la pyllait da u President ka JSU u samla Jersom Shylla.
