Shillong, Ïaïong 29
U Symbud Myntri Rangbah ba khmih ïa ka tnat Kam Pohïing (Police), Bah Prestone Tynsong u la pyntip ba ym don satia ki briew na Pakistan kiba sah ha Jylla Meghalaya, ha kaba u la ong ruh ba ka Sorkar ka la peitngor bha ïa ka jinglong jingman ha ki jaka khappud ka Jylla bad ka Bangladesh.
“Ïa mynta ym pat don satia ki nong Pakistan ha Meghalaya,” la ong u Bah Prestone haba kren bad ki lad pathai khubor ha ka sngi Ba-ar.
U Symbud Myntri Rangbah ha ka sngi Ba-ar u la lum ïa ka jingïalang bad ki heh ophisar ka Jylla, kynthup ïa u Chief Secretary bad Director General of Police (DGP) ban ïathir ha kaba ïadei jingpynneh ïa ka aiñ-kanun bad kumjuh ka jingpynbiang ïa ki bor pahara ha khappud.
“Ïa mynta baroh ki kam ki biang. Ngi la peitngor bha ïa ka jinglong jingman ha ki jaka khappud bad ka Bangladesh,” u la ong.
Lah ban kdew ba ka Ministry of Home Affairs (MHA) ka la phah mih lut ïa baroh ki nong Pakistan kiba don ha India. Baroh ki nong Pakistan lait noh kito kiba wan lyngba ka Long Term Visa bad ka Diplomatic lane Official Visa ba ki dei ban mih noh mardor na u pud u sam ka ri India ha lane shwa ka 27 tarik u Ïaïong, 2025, kiba wan lyngba ka Medical Visa ki dei ban mih noh na ri India shwa ka 29 tarik u Ïaïong, kito kiba wan lyngba ka SAARC Visa ki dei ban mih noh shwa ka 26 tarik jong u bnai Ïaïong 2025 bad kino-kino ki bym bud ïa kine ki hukum kiba la pynmih, kin ngat ha ka jingpynshitom kaba tyngeh katkum ki kyndon aiñ.
Kane ka jingpynmih hukum ka MHA ka dei hadien ka jingjia shah siat ïap jong 26 ngut ki nongleit jngohkai pyrthei ha ki lehnoh ka ri Pakistan kaba la jia ha Pahalgam, Jammu & Kashmir ha ka 22 tarik mynta Ïaïong 2025.
Haba kubur ba ka jinglong jingman ka dei ka bym lah ban batai, u Bah Prestone u la ïathuh ba la dep ai ka jingbthah kaba shai ban pynthikna ba ym dei ban don ki briew kiba ïoh rung tuh shapoh u pud u sam ka ri India.
“Na ka liang ka Sorkar, ngi la bthah ïa baroh ki Khlieh Nongsynshar, ki bor pynïaid shnong ba kin ïatreilang bad ki bor pahara bapher-bapher khnang ba ngin long kiba shngaiñ bad ban ym ailad ïa ki ba nabar ba kin wan rung shapoh u pud ka ri India,” la ong u Symbud Myntri Rangbah.
