Shillong, Ïaïong 29
U Symbud Myntri Rangbah ka Jylla ba khmih ïa ka tnat Kam Pohïing (Police), Bah Prestone Tynsong u la pyntip ba la weng noh ïa baroh ki pulit na phyllaw jong ka skulbah North Eastern Hill University (NEHU) hadien ba peit thuh ïa ka jinglong jingman ha katei ka skulbah.
“Ngi la dep ban weng ïa ki bor pulit naduh hynnin ka miet hadien ba peit thuh ïa ka jinglong jingman bad hadien ba ïakren bha bad ka In-charge jong ka NEHU campus,” la pyntip u Bah Prestone ha ka sngi Ba-ar.
Ki samla pule hapoh ka jingïalam NEHU Students’ Union ka la pynbna ïa ka jingsangeh shong klas ba khlem pud bad pynlong ruh ïa ka jingïaid bad jingïasoi paidbah ban pyrshah ïa ka jingkem ïa u President ka NEHUSU, Sandy Sohtun bad ka jingwanrah ïa ki bor pulit hadien ka jingshah shoh u Assistant Professor Hindi, Dr. Alok Singh.
Haba kylli, u Bah Prestone u la ong ba kam long kaba donkam ïa ki Pulit ban pan jingbit ba kin rung shapoh ka phyllaw jong kano-kano ka jaka treikam ne jaka pule ka Sorkar Pdeng ne Sorkar Jylla namar baroh ka shong ha ka jinglong jingman.
“Kam donkam ban pan jingbit lada mih kano-kano ka jingjia kaba ngi hap ban leh eiei. Ngam ïohi ba dei ban da ïoh jingbit na ki bor ba dei khmih, phi tip ba ka Sorkar ka shim khia na ka bynta ka jingshngaiñ jong baroh khamtam ki samla pule, ki nonghikai. Kumta, ngim donkam ban da ïoh jingbit shwa ban rung hangno-hangno ruh la ka dei ha ki shnong ki thaw ne ki phyllaw jong kino-kino ki shnat treikam ne jaka pule ka Sorkar Pdeng ne Sorkar Jylla, ka shong beit ha ka jinglong jingman,” u ong.
Na ka liang u Symbud Myntri Rangbah u la kyntu ïa ki samla pule ba kin ailad ïa ka jingtohkit halor ka jingshah shoh u nonghikai, ba kan ïaid haduh ban da dep, khnang ban tip ïa ki jingshisha.
“Ngi la dep phah ïa ka khubor kaba shai ngi la kem ïa u President ka NEHUSU haba pynshong nongrim na ka ejahar. Kumta, ailad ba ka jingtohkit kan dep bad hadien ba la dep kane, baroh ki la long laitluid ban leit sha ïing kashari bad ka ïing kashari kan sa shim ïa ka rai la kan ai jamin lane ym ai jamin. Nga kyrpad ïa ki samla pule ba kin ailad ba ka jingtohkit kan dep, namar ym don mano-mano ba lah ban shu shim ïa ka aiñ ha la ka kti,” u la ong.
U la ong ba katkum ka ejahar la kdew ba u Professor u la shah shoh ha u President ka NEHUSU, bad na ka liang ka Sorkar ka kwah ban pynthikna ban don ka jingshngaiñ jong baroh kiba don ha Meghalaya.
Haba kylli shuh shuh, u Bah Prestone Tynsong u la pyntip ba ka jinglong jingman ha North Eastern Hill University (NEHU) ka la long jai-jai bad ka Sorkar kan dang bteng ban peitngor bha.
