Shillong, Ïaïong 29
Ki samla pule ka skulbah North Eastern Hill University (NEHU) ha ka sngi Ba-ar ki la pynlong ïa ka jingïaid paidbah ryngkat ka rah lama ïong bad pynkut pat da ka jingïasoi paidbah lane ka ‘Signature Campaign’ ban pyrshah halor ka jingshah kem u President ka NEHUSU u samla Sandy Sohtun.
Ïa ka jingïaid paidbah la sdang na Library bad la pynkut ha Gate 2 ha kaba ki samla pule ki rah ruh da ki lama ïong ban pyrshah ïa ka jingwanrah ïa ki pulit bad CRPF ba kiengatiar hapoh ka phyllaw jong ka skulbah NEHU.
Haba kren sha ki lad pathai khubor, u General Secretary ka NEHUSU u samla Toniho Kharsati u la ong ba kim lah ban pdiang ïa ka jingkem ïa u samla Sandy Sohtun naba kim shym la ïaid katkum ka lynti kaba dei namar ki pulit ki la wan ban kem ïa u Sandy da kaba phong jaiñ ïing.
U samla Toniho u la ong ba ka NEHUSU ha ryngkat bad ka KSU-NEHU Unit kim pyrshah ïa ka tnat pulit namar ki pulit ki wan ban peit ïa ka shongsuk shongsaiñ hynrei haba ki pulit kim lah ban wan da ka ‘uniform’ haba kem briew ka dei kaba la pynmih ïa shibun ki jingkylli.”
Haba pynrem ïa ki pulit bad CRPF, u General Secretary ka NEHUSU u la ong tang ban ïada ïa uwei u nonghikai, ki wanrah ïa palat 100 ngut ki pulit bad CRPF.
U la pynpaw ba ka jingshah kem u Sandy ka dei tang ka jingkynnoh namar haduh mynta, ki pulit ki dang tohkit ïa kaei kaba jia. Nalor kata, u la ong ba ka jingwanrah ïa ki bor pulit la leh khlem ka jingbit jong ki bor pynïaid ka skulbah da kaba wan bad sdang kem ïa ki samla pule bad ïaid pahara ha ki hostel”.
U la ong ruh ba ki long kiba kloi ban ïatreilang lada ki kwah ban tohkit hynrei kim lah ban pdiang ïa kane ka jingwan shapoh kane ka skulbah ban shu kem ïa ki samla pule.
