Nongstoiñ, Ïaïong 29
Ka lympung ïalehkai phutbol ba la tip kum ka Open To All Knockout Football Tournament 2024-25 ba la pynlong da ka New Nongstoiñ Sports Social & Cultural Club (NNSSCC) ka la nang jam shakhmat ha kaba ka Eh Rngiew FC ka la ïoh jingjop bad jam artad sha ka semi final jong kane ka lympung.
Kane ka jinglah ban pynthikna ka Eh Rngiew FC ka la wan hadien ba ka la lah ban pynliem noh ïa ka Sapki West FC da 4-2 kol ha ka quarter final kaba khatduh kaba la long ha ka sngi Ba-ar ha madan New Nongstoiñ.
Ïa kine saw tylli ki kol jong ka Eh Rngiew la ïoh ban thep ar kol da u Owen Pajuh ha ka minit kaba 20 & 63, kumjuh u Baby Sunday ha ka minit kaba 26 bad u Dibor Kara ha ka minit kaba 89. Katba ïa ki ar tylli ki kol jong ka Sapki West la ïoh ban thep da u Kyntiew Marthong ha ka minit kaba 87 bad 90+2.
Na ka liang ka NNSSCC ka la pyntip ba ka jingïalehkai semi final wat nyngkong (1st Leg) kan long ha ka 7 tarik u Jymmang hapdeng ka Mynjurlang FC pyrshah ïa ka Pynnoh Riwar FC, katba ïa ka wat ba ar (2nd leg) kan long ha ka 12 tarik u Jymmang.
Nangta, shuh shuh ka la pyntip ruh ba kawei pat ka jingïalehkai semi final wat nyngkong (1st Leg) kan long ha ka 15 tarik hapdeng ka Laitkor SC pyrshah ïa ka Eh Rngiew FC bad ka wat ba ar kan long ha ka 19 tarik u Jymmang.
