Shillong, Ïaïong 29
Ka kynhun ïalehkai phutbol Under-20 ka Jylla ka la sdang da ka jingjop ha ka lympung ïalehkai Swami Vivekananda U-20 Men’s National Football Championship 2025, hadien ba ka la pynliem noh ïa ka Rajasthan da 4-0 kol ha ka Sngi Ba-ar ha Narainpur, Chhattisgarh.
U Deibormame Tongper u la khur ïa ka hat-trick da kaba thep marwei haduh lai kol bad ïa kawei pat la pynbud da u Riborlang Lyngdoh Lyngkhoi na ka bynta ban pynlong ïa ka Meghalaya ban ïoh lai point ha ka Group-A.
Ha ka jingïalehkai kaba nyngkong kaba la long ha ka Sngi U Blei, kane ka kynhun ïalehkai hapoh ka jingïalam u Bah Bobby L. Nongbet kum coach ka la ïoh ei ïa ki lai point hadien ba ka Jammu & Kashmir ka la weng noh na kane ka lympung.
Haba phai sha kane ka jingïa-khun, la ong ba ka Meghalaya ka la lah ban pynpaw ïa ka jingtbit ha kaba kam shym la ailad ïa ka liang pyrshah ban pynphai wat tang shi kol ruh. Hapdeng kane ka jingïakhun ka Meghalaya ka la ïoh ban pynkhih jar nyngkong eh ha ka minit kaba 39 lyngba u Riborlang na ka bynta ban tam shi kol ha ka kylla step.
Hadien katto katne por ba la bteng ïa ka jingïakhun jong ka kylla miet ka Meghalaya ka la pynbud biang sa ar kol lyngba u Deibor-mame ha ka minit kaba 50 & 54. Une u rangïalehkai shakhmat u la ïoh syndon ïa ka hat-trick hadien ba u la ïoh ban thep ïa ka kol kaba lai lyngba ka penalty ha ka minit kaba 74.
Lyngba kane ka jingjop ka Meghalaya kan pynkhreh ïa ka jingïakhun kaba lai pyrshah ïa ka Kerala ha ka sngi Saitjaiñ.
Ki rangïalehkai kiba la ïoh mih madan ha kane ka jingïakhun ki long u Babitlang Wahlang (Goalkeeper), Rimankhraw Khar-umnuid (C), Nickyboy Swer, Arkini Laloo, Bipiush G Marak, Banlamkupar Rynjah, R.T Hanson Pdang, Deibormame Tongper, Riborlang Lyngdoh Lyngkhoi, Mebannangkiew Tha-bah, Pyrkhatshaphrang Sumer, Ricky Kharkongor, Banpliebok Khongjoh, Chibaitki Pamthied bad u Franky Dkhar.
