Shillong, Ïaïong 29
Ki kam tuh kam thiem ki dang jur na kawei ka sngi sha kawei pat, haduh ba ym don jingshngaiñ shuh, la ka long ki tiar ki tar ha ki jaka ai jingsumar ne ki arshaka bad kumjuh ruh ka jingshah prong tuh jong ki ïing.
Katkum ka khubor na ki pulit la ong ba ka Medical Superintendent jong ka Civil Hospital, Khliehriat ha East Jaiñtia Hills ka la ujor ba ha ka step jong ka 23 tarik mynta u bnai, ki runar bym lah ban ithuh ki la tuh ïa ki tiar ki tar na phyllaw jong ka hospital.
Ka Medical Superintendent ka la pyntip ba ki tiar ba la shah tuh ki long kawei ka oxygen pipe line, u copper wire fan bad ki socket kiba shongdor haduh kumba T.1.2 lak.
Ha kawei pat ka khubor, u Arjun Kumar Mahatoo u la ujor ba hapdeng ka miet 26 bad 27 tarik mynta u bnai, katba u dang thiah hapoh ka jaka ïeng kali ka MUDA ha Mawlonghat, Ïewduh, Shillong, ki runar bym lah ban ithuh ki la tuh ïa ka arshaka jong u, kaba don ïa u registration number AS01-EG-1106, kawei ka mobile phone bad ka bek pisa.
U Riadur Rahaman uba na Kandergaon ha West Garo Hills u la ujor ba ha ka 14 tarik mynta u bnai, ha ka por kumba 2 baje mynsngi, u la lap ba ka arshaka ka jong u, ka la jah na ka jaka ba u la pynïeng ha ka shnong.
Katba na ka liang jong u Kandorpo Hajong u la ai ka jingujor ba ha ka 26 tarik mynta u bnai, ki runar bym lah ban ithuh ki la tuh ïa kawei ka Air Condition kaba rim na ka tower BSNL kaba don ha Ghoramara ha West Garo Hills.
Ha kawei pat ka khubor, na ka liang jong u Pupartbrook G Momin u la ujor ba ha ka 25 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML13-A-7093 na ka phyllaw jong ka jaka sah ka jong u ha North Garo Hills.
