Jowai, Ïaïong 29
Ka jingïalehkai jong ka Under-16 Boys Inter District Cricket Tournament 2025 (Zone-1) hapdeng ka RBDCA pyrshah ïa ka WJHDCA ha ka sngi Ba-ar ka la long kaba noh shiliang namar ka RBDCA ka la jop da 172 run.
Ka RBDCA ka la jop kynting pisa bad kam trai shwa ban tied nyngkong ha kaba ka la ïoh 224 run bad shah pynhap 9 wiket ha ki 50 over. U Soham Shah u la tied marwei 77 run na 78 bol ryngkat 2 tylli ki ‘six’ bad 9 tylli ki ‘four’. Kumjuh u Nobojit Chetri u la tied 61 run na 63 bol bad u Anmol Shah pat u la ïoh 48 run na 60 bol.
Katba ki nongkawang bol jong ka WJHDCA, u Felix Lamare u la shim 3 wiket ha ki 7 over, u Wansuklang Pala bad u Sebastian Rongngi ki la shim mar 2 wiket, katba u Waibhami Ryngkhlem bad u Nathaniel Syngkon ki la shim mar 1 wiket.
Haba wan beh ïa ka thong, ki nongtied ka WJHDCA ki la shah pynhap wiket baroh na ka bynta ban tied tang 52 run ha ka 23.5 over. U Meroily Lytan u la tied 19 run na 36 bol. Katba ki nongkawang bol ka RBDCA, kita u Anmol Shah u la shim 5 wiket na 8 over, katba u Maxborn Sangma bad u Nobojit Chetri ki la shim mar 2 wiket bad shi wiket da u Keshab Shah.
Ka jingïalehkai ha ka sngi Balang kan long hapdeng ka WKHDCA pyrshah ïa ka EJHDCA ha ka por 8:30 baje mynstep.
