Shillong, Ïaïong 29
Ka Meghalaya Tribal Tea -chers’ Association (MeT -TA) NEHU, Shillong ka la pynpaw ba ka jingwan poi ka kynhun ki bor pulit CRPF hapoh ka jaka pule jong ka skulbah North Eastern Hill University (NEHU) ha ka 28 tarik u Ïaïong, 2025, ka long kaei-kaei ka jingsngewkhia kaba jur bha da kaba pynpaw ruh ba kum kane ka jingjia kam pat ju jia satia mynno-mynno ruh bad kaba long khlem nongrim satia.
Ha ka kyrwoh ba la pyllait da u Professor Desmond L Kharmaw-phlang, President bad ka Dr. Jacqueline J Thabah, Secretary jong ka MeTTA-NEHU, Shillong, ki la pynpaw ba kane ka jingwan poi jong ki bor pulit CRPF hapoh ka skulbah ka dei kaba la leh khlem da don ki bor jong ka aiñ ban ïamir jingmut bad ka bor jong ka skulbah ne wat ban pyrshang ban ïoh jingbit hashwa ba kin rung shapoh ka skulbah.
“Ka MeTTA ka la ïohpdiang ïa ki jingïakren lyngba ka phone na ki samla pule kiba la pynpaw ïa ka jinglyngngoh bad ka jingsheptieng ïa ki samla pule ïa ka jingdon jong ki briew kiba phong uniform bad kiba ïaid ha ki bynta bapher-bapher jong ka skulbah kiba la long kiba la pynkhreh bad ki la ïathuh ba katkum ka jingkhmih, kitei ki pulit kin don slem ha katei ka jaka bad ba ki trok bad ki kali jong kitei ki pulit ki la long kiba pynkhreh ha ryngkat bad ki jingbam bad ki tiar sah”, ong ka MeTTA.
Ka MeTTA ka la ong ba ka jingdon jong ki bor pulit kiba bun ha kum kane ka jaka ha kaba ïadei bad ka jingshah kynnoh ba la don ka jingthombor ka long kaba ym pat ju jia bad kaba ym pat ju ïohsngew bad ka jingmih na kane, ka la wanrah ïa ka jingsngewsih bad ka jingtieng hapoh ka skulbah kaba kynthup ïa ki samla pule, ki nonghikai, ki nongkyrshan bad ki nongtrei ka skulbah.
“Ka jinglong-jingman jong ka jingpule hapoh ka campus ka la shah pynthut haduh katta-katta, ba la pynsangeh bad iehnoh ïa ki kam jingpule bad ki kam synshar kiba bun jait. Ka MeTTA ka pynrem jur ïa kane ka jingpyni bor kaba paw pyrthei kaba la wanrah ha ka jaka pule kaba khlem da tip eiei”, ong ka MeTTA.
Shuh-shuh, ka MeTTA ka la ong ba hadien ka jingpyrkhat kaba jylliew ka la ïohi ïa kane ka jingjia kum kawei na ki jingleh thok jong ki briew bad ki seng kiba don ka jingthmu ban pynsniew ïa ka jinglong-jingman jong ka NEHU da kaba pynbeit na jngai ïa ki jingthmu kiba pynpait-pynpra bad kiba pynsniew.
“Ai ba kine ki nongpynïaid jingïalehkai kin shah maham ba ka MeTTA kan ym shah ïa kum kine ki jingthmu ba sniew bad ka la long kaba pynkhreh ban ïaleh pyrshah ïa kum kine ki nongleh kam sniew da kaba stet bad da kaba kut jingmut”, ong ka MeTTA.
Ka MeTTA, NEHU ka la pynpaw ba ka shimkhia na ka bynta ka jingbha-jingmiat jong baroh ki nongshim bynta ha ka skulbah, ka jingpynneh ïa ka jingshongsuk-shongsaiñ lyngba ka jingburom kaba markyllaing, ka jingbud ryntih ïa ka aiñ bad ki kyndon jong ka NEHU bad ka jingkyntiew ïa ka jingnang-jingstad kaba bha.
“Ka MeTTA ka angnud ruh na ka bynta ka jingbha jingmiat kaba bteng jong ki nongshim bynta ha ka skulbah kiba dei ki trai ri-trai muluk jong ka jylla Meghalaya”, bynrap ka MeTTA.
Ka MeTTA ka la kyntu ruh ïa ka jingbud ryntih ïa ki kyndon treikam ba la buh kiba ïalam ïa ka jingïadei hapdeng ki bor synshar bad ki bor Sorkar bad kaba kongsan tam ka long ka jingithuh ïa ka jingsynshar kaba baroh ki skulbah ki ïoh kum ka hok bad ka jingtreikam.
