Shillong, Ïaïong 29
U Symbud Myntri Rangbah ka Jylla ba khmih ïa ka tnat Kam Pohïing (Police), Bah Prestone Tynsong u la pyntip ba ka Sorkar Jylla ka la dep ban phah ïa ka shithi sha ka tnat Ïada Ri (Defence Ministry), na ka bynta ban ïoh ïa ka jaka shipai ban pynkynriah ïa ki briew na Them Metor, Them Ïew Mawlong, hynrei haduh mynta ka Ministry kam pat ai satia ïa kano-kano ka jubab.
Ha ka sngi Ba-ar u Symbud Myntri Rangbah u la lum ïa ka jingïalang bad ki heh ophisar ka Jylla ba la don lang ruh u Symbud Myntri Rangbah ba khmih ïa ka tnat Pynroi Sor, Bah Sniawbhalang Dhar, ha kaba ïakren sani bad buddien halor ka kam ban pynkynriah ïa ki briew ba sah ha Them Metor .
“Ngi dang ap ïa ka jingphah ktien na ka Ministry, namar ngi la kyrpad na ka Sorkar India lyngba ka tnat Ïada Ri, shen ka Ministry kan sa phah ïa ka jubab,” la ong u Bah Prestone haba kren bad ki lad pathai khubor hadien ka jingïalang.
Haba kylli, u Symbud Myntri Rangbah u la pyntip ba ka jingïalang ka la ïakren halor ka jingkyrpad ka Sorkar Jylla ban ai ïa ka jaka jong ki shipai ka bym shym la pyndonkam ha Lum Survey, na ka bynta ban pynkynriah ïa 342 tylli ki longïing kiba sah ha Them Ïew Mawlong.
“Hooid, ha ka jingshisha ngi la dep ïakren ïa katei ka mat bad mynta ngi dang ap ïa ka jingpyntip na ka Sorkar India lyngba ka Defence Ministry namar ïa ka shithi ngi la phah, hynrei ngim pat ïoh ïa kano-kano ka jubab. Ngi la kyrpad ïa ka Sorkar India lyngba ka Defence Ministry lada ki lah ban ai ïa ngi ïa katei ka jaka kaba ym shim la pyndonkam da ka tnat Defence,” u la ong.
U Bah Prestone u la ïathuh ba ka Sorkar ka la aiti ha u Commissioner and Secretary jong ka tnat Urban Affairs ban buddien ïa kane ka kam bad ka Defence Ministry, bad pynpaw ka jingkyrmen ba shen ngin sa ïoh noh ïa ka jubab.
