Mawkyrwat, Ïaïong 30
Kawei ka longkmie kaba dang 26 snem ka rta ka la mynsaw jur hadien ba ka la shah shot shah dat bad shah ot da ka tari na u ryndang ha uwei u briew kaba la jia ha ka shnong Nongnah ha South West Khasi Hills.
Katkum ka khubor na ki pulit la ong ba u briew uba la suba bad shah kynnoh donkti ha katei ka kam dei ba la tip kyrteng u Jacinth Sangleiñ na ka thaiñ Nongnah, South West Khasi Hills District.
Shuh shuh katkum ki tyllong khubor na ki pulit la ïathuh ba katei ka longkmie ka dei na ka shnong Thangrai Nongnah bad pyntip ruh ba halor kane ka jingjia, ki pulit ka thanat Ranikor mar ïa ïoh jingtip, ha ka 30 tarik u Ïaïong, 2025 ha ka por kumba 3 baje eiei janmiet mar mar ki la leit sha katei ka jaka bad ki la ïoh ban kem ruh ïa utei u briew uba suba donkti ban leh ïa katei ka kam.
Ha kajuh ka por na ka liang jong ki pulit ki la ïathuh ruh ba ki la lap ïa ka tari ba la pyndonkam ban ot ryndang na ka ïing jong katei ka longkmie. Ïa katei ka longkmie la pynkit noh mar-mar sha Civil Hospital Mawkyrwat ban pynïoh ka jingsumar kaba kyrkieh bad mynta ka dang don ha ka jingshah sumar.
La ïathuh ruh ba ki pulit ki la register ïa ka case ha Mawkyrwat Women Police Station bad la ïathuh ruh ba ka kynhun jong ka Forensic bad ka Fingerprint na Shillong ki la hiar sha katei ka jaka na ka bynta ban lum ïa ki sakhi-sabut ban lap ïa ka jingshisha.
