Shillong, Ïaïong 30
Ki paidbah nongshong shnong jong ka Rangasora ki la ïoh ban bat noh ïa ki lai ngut ki nongtuh masi, katba uwei pat u la lait phet.
Katkum ka khubor kaba la ïoh na ki pulit la ong ba u Jacquish D Sangma bad ka Rosemary D Sangma, ki la ai ka jingujor sha ki pulit ba ha ka 24 tarik mynta u bnai, ha ka por kumba 10.30 mynmiet, saw ngut ki briew ki la tuh ïa ki ar tylli ki masi na ka shnong Rangasora ha South Garo Hills bad thep ha kawei ka kali Bolero Camper kaba don ïa u registration number ML08-K-4381.
Kitei saw ngut ki briew kiba la kynnoh donkti ha ka ban tuh ïa ki masi ki dei ba la tip kyrteng kum u Pabean D Sangma (29 snem), u Rajmijush D Sangma (21 snem), u Spenson T Sangma (31 snem) bad u Luthas Ch Marak (32 snem).
Pynban la ong ba wat la ki la ïoh ban tuh, hynrei kham hadien ki nongshong shnong ki la ïoh ban bat noh ïa u Rajmijush D Sangma, Spenson T Sangma bad u Luthas Ch Marak. Kumta ha ka 25 tarik mynta u bnai, ki la leit ban aiti noh ïa kitei lai ngut sha ki pulit bad u Pabean D Sangma u la ïoh ban phet krad.
