Shillong, Ïaïong 30
Ka jingsoi Inter Club Transfer kaba la neh haduh khyndai sngi lynter ba la pynlong da ka Shillong Sports Association ka la poi sha kaba kut ha ka Sngi Balang. Ha kane ka jingkynriah klob ki la don haduh 331 ngut ki rangïalehkai kiba la pyndep ïa ka jingsoi soskular ban leit ïasoh sha kiwei pat ki klob thymmai.
Kane ka long ka rekod kaba heh duh ha kine ki shiphew snem ha ka jingdon ki rangïalehkai kiba la pyndep ïa kane ka jingsoi soskular bad mynshem snem ki la don 295 ngut.
Wat la ha kaba sdang jong kane ka Inter Club Transfer naduh 21 tarik ka la long kaba duna bha ha ka jingpoi ki rangïalehkai, hynrei dei tad haduh kane ka sngi kaba khatduh ha kaba la sakhi ïa ka jingtuid ki rangïalehkai ban pyndep ïa kane ka jingsoi soskular ha ka miej jong ka Shillong Sports Association.
Ha kane ka sngi kaba khatduh ki la don haduh 126 ngut ki rangïalehkai kiba la wan ban pyndep ïa ka jingsoi soskular. Wat lada la dep ban ai kylluid ïa ka por ba kin pyndep, hynrei dang don kiba dang wan hadien ha kaba ym shym la lah shuh ban pdiang ïa ki.
Hadien ba la kut ka por jong kane ka Inter Club Transfer, na ka liang ki dkhot ka Shillong Sports Association ki la soi ïa ka muhor ban pynskhem ïa kane ka jingsoi jong 331 ngut ki rangïalehkai ki ban ïoh ïalehkai na ki klob kiba thymmai naduh ka aïom ka ban wan.
