Shillong, Ïaïong 30
Ka All India Football Federation (AIFF) myn ha ka lah sngi U Blei ka la kyntu ïa ka Churchill Brothers ba kan pynphai biang ïa ka trophy I-League ïa kaba ka la aiti sha kane ka klob watla ka la don ka jingpynsangeh ïa ka rai (stay order) na ka Court of Arbitration for Sport (CAS).
Ha ka Sngi U Blei, katto katne kynta hadien ba ka CAS kaba na Switzerland ka la pynsangeh ïa ka rai jong ka AIFF ban pynbna ïa ka Churchill Brothers kum ka lahduh ha ka I-League bad khang ïa ka ban pynlong ïa kano kano ka jingpynkup burom, ka synjuk jong ka ri ka la ai ïa ka trophy jong ka nongjop sha ka klob kaba na Goa.
U Deputy Secretary General ka AIFF u M. Satyanarayan u la aiti ïa kane ka trophy sha ki rangïalehkai ka Churchill Brothers bad hadien u la kam ba ka synjuk ka la tip ïa kane ka hukum jong ka CAS tang hadien ba la kut ka jingleh burom ïa katei ka kynhun.
Hynrei ha ka lah sngi U Blei ka AIFF ka la kyntu ïa ka Churchill ba kan pynphai noh ïa ka trophy. “Ha ka lah sngi U Blei, ngi la thoh sha ka Churchill Brothers ban pynphai biang ïa ka trophy I-League,” ong ka tyllong khubor na ka AIFF.
“Ngi dei ban kohnguh ïa ka hukum jong ka CAS. Ai ba ka CAS kan rai ïa kane ka kam, bad ngin sa aiti ïa ka trophy hadien ka rai kaba khatduh.”
Lah ban kdew ba ka Disciplinary Committee jong ka AIFF ka la ai ïa ka Inter Kashi da kaba jop da 3-0 bad ka la ïoh 3 poiñ hadien ba ka la rai ba ka Namdhari ka la pynïalehkai da u nongïalehkai bym dei hok.
Kata ka rai kan jin da la rah ïa ka Inter Kashi sha ka 42 poiñ, kaba biang ban rah ïa ka nam lahduh. Hynrei hadien ka Appeal Committee jong ka AIFF ka la buh ïa ka hukum jong ka komiti pynshitom halor ka jingbym kohnguh katba dangap ïa ka jingbishar kaba khatduh.
Hadien ka jingpynslem, kynthup ïa ka jingpynkynriah ïa ka jingbishar ha ka 12 tarik u Ïaïong namar ba u nongïasaid aiñ jong ka Namdhari u la kdew ïa ka “jingpang”, ka Appeals Committee jong ka AIFF ha ka 18 tarik ka la weng noh ïa ka hukum jong ka Disciplinary Committee bad rai ha ka liang jong ka Churchill.
Halor kane ka nongrim jong ka Appeal Committee, ka AIFF ka la pynbna ba ka Churchill Brothers kum ka lahduh jong ka I-League.
