Jowai, Ïaïong 30
Ka tnat Animal Husbandry & Veterinary ka Jylla ha ka 29 tarik Ïaïong ka la aiti noh ïa ka jaka shoh doh ne slaughter house kaba don ha ka shnong Demthring sha ka Jaiñtia Livestocks Butcher’s Welfare Association (JLBWA) bad ka Dorbar Shnong Demthring, West Jaiñtia Hills ba kin pynïaid katkum ka juk kaba mynta da kaba khuid bad suba.
Ïa kane ka jaka shoh doh ne ka Bi Species Abattoir la shna da ka tnat Veterinary ka Sorkar Meghalaya lyngba ka Central Scheme kaba kot T.7 klur tam, bad la plie ïa kane ka jaka otdoh da u Bah AL Hek Myntri ka tnat AH & Veterinary ha ka 19 tarik Nohprah 2023.
Hynrei, ha ka 29 tarik ka tnat Veterinary ka la aiti noh ïa kane ka jaka shohdoh ryngkat ka MOU sha ka Jaiñtia Livestocks Butcher’s Welfare Association bad ka Dorbar Shnong Demthring ban pynïaid ïa ka.
Ïa kane ka MOU la aiti da ka Dr. M Kharshandi Director AH & Veterinary sha ka JLBWA bad ka Dorbar Shnong Demthring WJH ha ka jingïadon lang u Dr. WMW Khongwir, Joint Director, Dr. A Chyne Deputy Director, ka Dr. E Passah Assistant Director bad Bah K Mawlong EE (CEW) AH & Veterinary Jowai.
Katba na ka liang ka JLBWA la wan ban shimti ïa ka MoU da u Ma Lewis Pyrtuh President bad u Ma Dayoolangki Ryngkhlem General Secretary bad na ka Dorbar Shnong Demthring pat la wan shimti ïa ka MoU da u Ma Elword Ryngkhlem Waheh Shnong bad u Ma Turchwamiki Ryngkhlem Secretary shnong.
Naduh kane ka sngi kane ka jaka shohdoh ka la sdang ban treikam bad ka rukom shohdoh ka la long kaba khuid bad suba namar ki la hap ban bud katkum ki kyndon aiñ kiba ka tnat Veterinary ka la buh hashwa ba kin shoh doh ïa ki masi ne ki sniang ïa kiba dei ban peit bniah shwa da ki doktor khnang ban pynthikna ba ki dei kiba shait ba khlaiñ ne kiba bit ban pyndonkam da ki briew ha kaba bam ïa ki.
Katkum kane ka MoU ka tnat Veterinary ka la shna ïa ka jaka shoh doh kaba katkum ka juk ha Demthring kaba lah ban shoh haduh 50 tylli ki masi bad 100 tylli ki sniang ha ka shi sngi da ka jingthmu ban pynbiang ïa ki nongbam doh jong ka sor Jowai ïa kiba lah ban pynbiang ha ka rukom kaba khuid ba suba. Kane ka jaka shoh doh ka la don lut ïa ki jingdonkam kiba kongsan, kata kum ka jingpynbiang um, ka bording, ka ophis bad kamra buh mar, ka jaka pynkhuid ïa ki um jakhlia, ka jaka buh ïa ki masi bad sniang, ka jaka pynkhriat, ka jaka shoh kaba la ka jong na ka bynta ki masi bad sniang. Baroh kine ki jingtreikam kin hap hapoh ka jingkhmih da ki ophisar jong ka tnat Veterinary khnang ban pynthikna halor baroh ki jingbit jingbiang.
Katba ka tnat Veterinary ka la mynjur ïa ka jingïateh kaba na ka bynta 10 snem sha ka JLBWA bad DS Demthring katkum ki kyndon ba la kdew ha ka MoU, ka tnat kan ailad ïa ka jingpynïaid ïa baroh ki jingtreikam sha ka JLBWA bad DS Demthring, hynrei ka jinglong trai ïa ki jaka puta, ki jaka wah ïa ki mrad (masi, sniang), ki mashin lem bad kiwei pat ki jingdon jingem ba la pynbiang da ka JLBWA bad DSD dei ban buh dor lada hap shimti noh da ka tnat ynda la kut ka por ai wai.
Ka bynta jong ka DS Demthring ka long ban khmih halor ki jingtreikam jong ka JLBWA, ban pynbeit ïa ka jingkheiñ halor ki pisa ba la lum lyngba ka jingnoh synñiang jong ka JLBWA bad da kane ka pisa ka DS kan sumar bad maramot ïa ka jaka shoh doh, ka jingsiew ïa u nongpynïaid ne operator bad ka bai bording.
Ka Dorbar shnong kan thaw ïa ka committee kaba don 3 ngut ki dkhot na ka DS, 4 ngut ki dkhot na ka JLBWA bad uwei u nongmihkhmat na ka tnat Veterinary, ka jingbud ryntih ïa ki aiñ ban tehlakam ïa ka jingjaboh bad ka bor ba dei peit na ka bynta ban pyntreikam ïa ka jaka shoh doh.
Katba ka jingkitkhlieh jong ka JLBWA ka long tang ki briew kiba la aibor ban rung shapoh ka jingtei jong kane ka jaka shoh doh da kaba peit bha ïa ki kot ki sla jong ki nongtrei ne ki trai la leh ha ka khyrdop, ka jingbud ryntih ïa ki aiñ treikam, ki aiñ pynneh pynsah ïa ki jingbam bad ka jingkhanglad ïa ka jingleh tohmet ïa ki mrad, ka jingshngaiñ jong ki briew ha kane ka jaka katba ki dang pyntreikam ïa ki mashin bad ki tiar elektrik, ban ym bret ïa ki jaboh bym pat pynkhuid sha ki jaka ba marjan.
Katba ka bynta jong ka tnat Veterinary ka long ba ka tnat ka lah ban ai jingmut ha kano kano ka por ba donkam sha ka committee, ka jingpeit bniah kyllum ïa ki nongtrei ka shong ha u nongpynïaid jong ka District AH & Vety Officer- Jowai bad ka jingpynïaid ïa ka koit ka khiah jong ki mrad kynthup ïa ka jingpeit bniah ïa ka jingïap bad hadien ka jingpynïap ïa ki mrad, ka jingleh ïa ki eksamin yn khmih da ki Doktor Veterinary ba la thung da u Director.
Ha kaba ïadei bad ki kam pisa la rai ba yn ym don kano kano ka Security deposit na ka JLBWA bad ka DS Demthring ha ka liang jong u Director namar ïa ka jaka la ai sngewbha da ka Dorbar Shnong, Demthring WJH.
