Shillong, Ïaïong 30
Ka kol ba la thep da u Ousmane Dembele ka la pynlong ïa ka Paris Saint-Germain (PSG) ban pynliem noh ïa ka Arsenal da 1-0 kol ha ka semi final wat nyngkong (1s leg) jong ka Champions League ha ka Sngi Balang ha Emirates.
Kane ka nam jop ka wan urlong tang mar ïasdang ka jingïalehkai kata ha ka minit kaba 4 na ka bynta ban pynlong ïa katei ka kynhun ba khlaiñ bor jong ka Ligue 1 ban nangjan na ka bynta ban ïoh rung sha ka final.
Ka Arsenal kaba ïakhun ïa ka semi final jong ka UCL ha ka sien ba nyngkong naduh u snem 2009, ka la nangkiew ha ka rukom ïalehkai hadien ba ka la shah thep ha kaba sdang ka jingïalehkai, ha kaba ka la ïoh ïa ka kabu kaba biang lyngba u Mikel Merino, hynrei u rangapkol ka PSG u Gianluigi Donnarumma u la lah ban pyllait na ka jingshah thep. Katei ka kynhun ba khlaiñ bor jong ka Ligue 1 ka la ïoh ïa ki kabu kiba biang, hynrei u Bradley Barcola bad u Goncalo Ramos kim shym la lah ban pynurlong haduh kaba kut ka jingïalehkai.
Ka jingïakhun semi final wat ba ar kan long ha ka 7 tarik u Jymmang ha kaba kine ki kynhun kin hap ban ïakhun tyngeh na ka bynta ban ïaknieh rung sha ka final.
