Shillong, Ïaïong 30
Ka Cabinet Committee halor ka Economic Affairs ba la pynïaid da u Myntri Rangbahduh ka ri, u Narendra Modi, ka la mynjur ïa ka surokbah ‘High Speed Corridor’ ban pynïasoh ïa ka nongbah Shillong bad Silchar.
Ka kyrwoh na ka PIB ha ka Sngi Balang ka la ong ba ka jingtyrwa na bynta ban pynroi, maramot bad pynïaid ïa ka ‘4-lane Greenfield Access Controlled’ kaba jrong 166.80 km jong ka surokbah (National Highway) No. 6 kan long na Mawlyngkhung (hajan Shillong), Meghalaya, sha Panchgram (hajan Silchar), Assam ha ka ‘Hybrid Annuity Mode’ kum ka ‘Access Controlled Greenfield High-speed Corridor’ ha ka jinglut baroh kaba T.22,864 klur.
Ka jingjrong jong kane ka surok kaba long 166.80 km ka don ha Meghalaya (144.80 km) bad Assam (22.00 km).
Kane ka surok ba la tyrwa, kan pynbha ïa ka jingshakri na bynta ka ïaid ka ïeng jong ki kali na Guwahati sha Silchar, ka jingpynbha ïa ka lad pynïasoh sha Tripura, Mizoram, Manipur bad ka thaiñ Barak Valley jong ka Assam na ka jaka thor bad Guwahati – ka ban pynduna shi kat dei ïa ka jingjngai bad ka por ha ka leit ka wan. Kane ha kawei ka liang, kan ïarap ban kyntiew ruh ïa ka kam pynpoi mar jong ka ri.
Kane ka lynti kan pynbha ïa ka lad pynïasoh hapdeng ka Assam bad Meghalaya bad kan kyntiew ruh ïa ka ïoh ka kot, kynthup ïa ka jingkiew jong ki karkhana ha Meghalaya, namar ba ka ïaid lyngba ki jaka pynmih dewbilat bad dewïong (jong ka Jylla).
Kane ha kajuh ka por kan pynbiang ïa ki nongjngohkai pyrthei kiba wan na Kad Liengsuiñ – Guwahati, Shillong, Silchar (lyngba ka NH-06 kaba la don lypa) kaba pynïasoh ïa ka Guwahati sha Silchar.
Nalor kane, kan pynïasoh ruh ïa ki jaka mariang baitynnad kiba khring ïa ki nongjngohkai pyrthei ha ka Thaiñ Shatei Lam Mihngi bad kyntiew ruh ïa ki kam jngohkai pyrthei.
Kane ka projek pynroi kaba kongsan kan pynbha ïa ka lad pynïasoh jong ki jaka sor hapdeng ka Guwahati, Shillong & Silchar namar kan ïaid lyngba ka Ri-Bhoi, East Khasi Hills, West Jaiñtia Hills, East Jaiñtia Hills ha Meghalaya bad ka Cachar distrik ha Assam.
Ha kajuh ka por, kan pynduna ïa ka jingkhapngiah ha ka surokbah NH-06 kaba la don lypa bad kan kyntiew ïa ka jingpynroi ha ka leit ka wan katkum ka ‘PM Gati Shakti National Master Plan’.
Ka jingbeit ryntih jong ka projek ka pynïasoh lang bad ki surokbah ba kongsan, kynthup ïa ka NH-27, NH-106, NH-206, NH-37 kaba pynbiang ïa ka jingpynïasoh kaba khlem pynthut sha Guwahati, Shillong, Silchar, Diengpasoh, Ummulong, Phramer, Khliehriat, Ratacherra, Umkiang, Kalain, nalor kiwei.
Shuh shuh, ynda la pyndep ïa kane ka projek, ka surok Shillong – Silchar kan don ka bynta kaba kongsan ha ka jingkiew ka ïoh ka kot jong ka thaiñ, ban pynbha ïa ka jingpynïasoh hapdeng ka Guwahati, Shillong, Silchar, Imphal, Aizawl bad Agartala.
Kane ka projek ka ïahap ruh bad ka jingangnud ka Sorkar – ka ‘Atmanirbhar Bharat’, ban kyntiew ïa ki jingtei pynroi, nalor ka jingai-kam ai-jam kumjuh ïa ka roi ka par ha ka imlang-sahlang bad ka ïoh ka kot ha Meghalaya, Assam, Manipur, Mizoram bad Tripura, la bynrap ka kyrwoh.
