Tura, Ïaïong 30
Haduh saw ngut ki briew ba kynthup ïa ar ngut ki khynnah, ki la mynsaw jur hadien ba shah lympat bording kaba la jia ha ka shnong Hallidayganj ha West Garo Hills.
Ka jingshah lympat bording jong kine ki briew ka la jia ha ka Sngi Ba-ar hadien ka jingpluh jong kawei ka ïing, kaba dei trai da u Baten Ali. Namar ka jingklang jong ka ding, u waïar bording u la dkut bad lam sha ka jinglympat bording ïa saw ngut ki dkhot kane ka ïing.
Ki saw ngut kiba la mynsaw ha kane ka jingjia, ki kynthup ïa u trai ïing Baten Ali, ka kurim Jomella Khatun, u khun ba dang 3 snem u Abdul Habib bad ka Habiba Khatun ka khun kynthei ba dang 6 snem.
Ki pulit pynlip ding na ka Fire & Emergency Service Station ba marjan ka Hatsingimari, Assam, kila wan ban ïarap ha ka ban pynlip bad tem ïa ka ding ha shuwa ba kan pynjulor lut ïa ka ïing baroh kawei.
Ïa kine kiba mynsaw la pynkit noh sha ka Hatsingimari Civil Hospital ha Assam na ka bynta ban pynïoh ïa ka jingsumar bad hadien kane la pynkit noh sha GMCH, Guwahati ban pynïoh ïa ka jingsumar ba kham biang bad paka.
