Shillong, Ïaïong 30
Kawei ka longkmie (ba la buhrieh kyrteng) kaba dang 26 snem ka rta na kawei ka shnong kaba don ha khapsor, ka la mynsaw jur na ka jingshah shoh bad shah sympat ha la u jong u kurim ïa uba la kynnoh ba u la leh ïa kane ka kam ha ka por ba u la shoh khawiang.
Na ka liang ki bahaïing jong katei ka longkmie, ki la ïathuh ba kane ka la jia ha ka 28 tarik Ïaïong 2025 ha ïingsah.
Haba ïoh ban ïakren markhmat bad kane ka longkmie, ka la ïathuh ba man ka por u kurim jong ka u ju shoh ïa ka ynda u la shoh khawiang bad tang mynta u bnai Ïaïong saw haduh saw sien ka la shah shoh. Ka la ong ba ka daw ba ka la shah shoh ka dei namar ba ka tip pylleiñ-pylleiñ ba u ïaid kynthei shawei bad man ka por haba ka phone u ju kynhied bad pynlip syndon ïa ka phone bad ynda u la poi ïing u ju shoh pat ïa ka.
Haba ïakren pat bad ka kmie jong katei ka longkmie, ka la ong ba kum ka kmie ka sngew syier ïa ka shongkha shongman jong ka khun namar tang ba kan leit kai sha ïing jong ka ruh ym long shuh, ban ïakynduh ïa ki para ki hynmen ruh ym long shuh, hynrei ka la shu ïaid beit ha ka jingsyier mynsiem.
Ka la ïathuh ba utei u briew u la byrngem ruh ban tep im ïa ka bad ïa u khun ba dang rit.
La ïathuh ba ka jingjia shah shoh ka dei ha ka 28 tarik, hynrei ka kmie ka dang ïoh jingtip ha ka 29 tarik ha kaba ka la ïalam ïa katei ka khun sha Pomlum PHC, hynrei ha kajuh ka sngi la rah noh ïa ka sha Civil Hospital Shillong ban ïoh ka jingsumar kaba biang.
Na ka liang ka kmie ka la leit ban ujor ejahar ha thanat Mawngap bad ka la dawa ba dei ban kem ïa utei u briew.
Katkum ka jingujor la ong ba ha ka 28 tarik ha ka por 02:00 nohphai sngi, u Petrus Nongkhlaw (kurim) u la shoh ïa ka khun jong ka hapdeng ka jingbuaid khawiang khlem kano-kano ka daw.
Haba ïoh jingtip halor kane ka jingjia, ka Chairperson jong ka Meghalaya State Commission for Women (MSCW), Kong Ïamonlang Syiem ka la leit ban jngoh ïa kane ka longkmie ha jaka sumar bad ban tohkit ruh ïa kaba jia.
Haba kren sha ki lad pathai khubor ka Chairperson ka la ong ba katkum ka jingtip, ki la ïashong ïasah lang la ar snem eiei, haba la ïathuh ba une u kurim uba la kham ïaw ka rta u la shoh man ka por bad haduh saw sien la hap khun.
Ka Kong Ïamonlang ka la pynpaw ïa ka jingsngewsih halor kane ka jingjia bad ki jingjia kiba kum kine kiba mih man la ka por.
Ka Chairperson ka la kyrpad ruh ïa ki rangbah ba kin ym leh beiñ ïa ki longkmie, bad kyntu ruh ïa ki paidbah ba lada ki ïohi ïa kano-kano ka jingshah leh beiñ ki kynthei, dei ban ïarap lem ïa ki, da kaba pynpaw ba kum kine ki jingjia kim dei shuh ki kam ïing kam sem, hynrei ka dei ka jingeh jong ka imlang sahlang.
Ka Kong Ïamonlang ka la pyntip ba halor kane ka jingjia la ujor ejahar bad ka aiñ kan sa leh ïa kaba donkam, ha kajuh ka por ka la ong ba na ka liang ka Commission ruh kan dang ïai buddien ïa kane ka kam.
