Shillong, Ïaïong 30
U Joint Secretary ka All India Congress Committee (AICC) uba peit ïa ka Congress ha Megha-laya, Mathew Anthony, u la kynnoh ba kane ka Sorkar Meghalaya Democratic Alliance (MDA-II) kaba ïalam da ka National People’s Party (NPP), ka la tap da ki kam bamsap haduh ‘ñiuhmat, hynrei u Myntri Rangbah, Conrad K Sangma um nud ban leh eiei namar ba kane ka bamsap ka sdang naduh ka kamra treikam jong u.
U Anthony u la ïathuh ba ka jingïalang ka Political Executive Committee jong ka Meghalaya Pradesh Congress Committee (MPCC) kaba la long ha ka sngi Ba-ar ka la ïathir sani bha halor ka jingkynnoh bamsap ba la palat pud jong ka Sorkar MDA ba la ïalam da ka NPP.
U la ong ba ha kane ka Sorkar, kaei-kaei bad baroh ki dei beit ban die, kaba wanrah pat ïa ka jingkiew dor, pynbun ïa ki jingeh bad ka pynkhia ruh ïa ka jingkit ki paidbah ka Jylla. U la ong ba ka bamsap ka sdang naduh ka skhim sam um, ka skhim bylla 100 sngi bad kiwei-kiwei ki skhim.
“Phi ktah ïa kano-kano ka dei ka bamsap, sdang naduh ka skhim sam um, ka NREGS bad haduh ba ym lah ban leh eiei shuh,” la ong u Anthony haba kren bad ki lad pathai khubor ha ka sngi Balang.
Haba kynthoh pyrshah ïa u Myntri Rangbah ka Jylla, u la ong ba u Myntri Rangbah um lah ban leh eiei namar ba kaba bun ka bamsap ka sdang nyngkong na ka kamra treikam jong u.
“U Myntri Rangbah um lah ban leh eiei ne tehlakam namar ba kaba bun ka bamsap ka dei kaba sdang na ka ophis u Myntri Rangbah, na kata ka daw ba ïa ka bamsap ha ki kyrdan ba shapoh ruh ym lah ban leh eiei shuh,” la ong u Nongïalam ka Congress, ha kaba u la pynpaw ruh ba ha ka jingïalang jong ka Political Executive Committee ki nongtrei ka Congress ki la pynpaw ka jingsngewkhia.
U Anthony u la ïathuh ba ka Congress ka la rai ban shim ïa kane ka mat, kan pule bniah ïa baroh ki kam bad kan rah sha ki paidbah ka Jylla Meghalaya ban pynshai.
