Shillong, Ïaïong 30
Ka eksamin Supplemen-tary jong ka Secondary School Leaving Certifi-cate (SSLC) kan sdang naduh ka 1 tarik Jym-mang, 2025 haduh ka 8 tarik Jymmang, 2025 ha ki 76 tylli ki jaka thoh eksam ba la buh kyrpang ha kylleng ka Jylla.
Na kine 76 tylli, 49 tylli ki don ha Ri-lum Khasi & Jaiñtia bad 27 tylli kiwei pat ha Ri-lum Garo.
Kumba ka long, 7085 ngut na ki 8918 ngut ki khynnah pule kiba dei hok, ki la pynrung kyrteng ban ïakhun ïa ka SSLC – Supplementary Examination, 2025; kaba long 79.44%.
Ki khynnah pule kiba la pynrung kyrteng na Ri-lum Khasi ki don 2235 ngut katba 4850 ngut ki dei na Ri-lum Garo.
“La khmih lynti ba ka Meghalaya Board of School Education kan pyndep ïa ki kam ba ïadei bad ka risol hapoh u bnai Jymmang (2025), ka ban plie lad pat ïa ki khynnah kiba poi sha ka thong ban bteng ïa ka jingpule jong ki ha ki skul ‘Higher Secondary’ ha kylleng ka Jylla,” ong ka kyrwoh na u Commissioner & Secretary ka tnad pule-puthi ka Sorkar Jylla, u Vijay Kumar Mantri. Na ka liang tnad pule-puthi ka kitbok-kitrwiang ïa baroh ki khynnah pule ki ban ïakhun ïa ka eksamin SSLC – Supplementary Examination, 2025.
Kum ban shu kdew hangne, ka ‘Supplementary Examination’ na bynta ka SSLC ka ai ka lad ka kabu kaba kongsan ha ka sien ka ba-ar na bynta ki khynnah pule ki bym shym la lah ban poi sha ka thong ha ki eksamin jong ka SSLC ba la pynlong ha u bnai Rymphang mynta u snem.
Shuh shuh ka jingdon jong ki khynnah pule kiba la poi sha ka thong ha ka eksamin Secondary School Leaving Certificate (SSLC) mynta u snem ka long 87.10% – kaba la kiew shi kat dei haba ïanujor bad ki snem kiba la leit.
