Shillong, Ïaïong 30
Ka khlur ïakura ka ri kaba la khur takma ha ka Olympic, ka Mary Kom, ha ka sngi Balang ka la pynthikna da kaba shai ïa ka jingpyllait sanshyieng bad la u kurim, u Karung Onkholer ba la ju tip kum u Onler.
Ïa ka jingpyllait sanshyieng la mynjur lang ha ka 20 tarik u Nohprah 2023, ha ka jingdon lang jong baroh ar ki longïing bad ki rangbah jong kine ki arliang kur, katkum ka ain riti dustur jong ka KOM.
Katei ka nongïakura ka la kren shaphang katei ka mat hadien ba katto katne ki lad pathai khubor ki la sdang ban pynphriang ïa ki khubor lamler shaphang ka jingim shimet jong ka.
Kine ki kynthup ïa ki jingkynnoh ba ka la don jingïadei bad u Hitesh Choudhary, u paralok ha ka kam khaïi bad u chairman jong ka Mary Kom Boxing Foundation, bad ki jingkynnoh ba ka don jingïadei bad uwei pat u rangïakura.
Kane ka jingpynbna ka la kren shai ba ka jingpyllait sanshyieng jong ka, ka long kaba ïasuk bad la pynkut noh da ki bnai mynshwa bad ka la ïaid shakhmat bad kam kwah ban kren eiei shuh shaphang ka jingïashongkha jong ka kaba la leit.
Ki khubor hamsaïa shaphang ka jingïadei jong ka bad u Hitesh Choudhary ne uno uno u briew, ki long kiba khlem nongrim satia bad ki long kiba lamler satia, la ong ka kyrwoh.
Lyngba kane ka kyrwoh, ka la kyntu ruh ïa ki lad pathai khubor ban burom ïa ka jinglong kyrpang jong ka bad ban kiar na kaba pynphriang ïa ki khubor kiba bakla.
Ka la maham ruh ba ka jingbym kohnguh ka lah ban wanrah ïa ka jingshah pynngat ha ka aiñ, kynthup ïa ka jingpynjah burom bad ka jingpynkheiñ ïa ki kyndon aiñ ba ïadei bad ka jinglong kyrpang.
Ka Mary Kom ka la pynpaw ruh ba ki ar snem ba la dep ki long kiba eh ha lade shimet bad ka la kyrpad ïa ki nongkyrshan, ki paralok, bad ki paidbah ban ai ïa ka jaka kaba ka donkam.
Ha ka jingïalang ba ki lad pathai khubor kaba ïadei bad kane ka kam la dep ban pynlong ha Mani-pur, bad ka la dep ban ai ïa ka jingpynbna paidbah halor kane ka bynta.
