Shillong, Ïaïong 30
Ka kamai ïa ka Hok, ka jingpyndonkam hok ïa ka sap bad ka jingïeng ha la ki jong ki kjat ka dei kaba ju kyntiew ïa u ne ka briew ha ka jingim ka jong ki bad ka dei ruh ka spah bah ba la kynshew hakhmat u Blei Nongbuh-Nongthaw.
Na ka liang U Nongsaiñ Hima, u la leit ban wad ïa u samla Mebalamlynti Syiemlieh uba dang 17 snem ka rta na ka shnong Lumkshaid, Lower Mawprem, uba dei u khynnah uba watla ka rta jong u ka dang lung bha hynrei u dei u khynnah uba la pyndonkam hok ïa ka sap kaba U Blei Nongbuh-Nongthaw u la ai ha u.
U Mebalamlynti u dei u samla uba dang shu dep ban pyndep ïa ka eksamin Matrik na ka skul St Anthony’s Higher Secon-dary, Shillong ha kaba u la ïoh ha ka 1st Division bad u la ïoh distinction ar tylli ki sobjek.
U Mebalamlynti u dei u samla uba naduh ba u dang lung ka rta u dei uba ju smat bha ban shna hi ïa ki cycle ne ki kali ïalehkai lada ki don kino-kino ki jingthut da kaba u ju law lut ïa ki tiar lyngkhot-lyngkhai bad ban shna biang kumba ki dei ban long.
Kaei kaba kham ai mynsiem shuh-shuh, ka dei ba u Mebalamlynti u khlem pynlehnohei satia ïa ka sap kaba u don hynrei u la ïai pyntbit ïalade khlem da ïoh kano-kano ka jinghikai ba kyrpang na kino-kino ki klas ai jinghikai hynrei u la pyntbit hi ïa kane ka sap shna kali bad thuk-thuk arshaka da kaba u la pyrshang hi nalade ban peit tang lyngba ki videos na ‘Youtube’ kaba la pynlong pat ïa u ba un lah ban shna syndon ïa ki kali saw shaka bad ki arshaka kiba sniew jong ki briew.
U Mebalamlynti u la ïathuh ba ka dei ha ka por ba wan lynshop ka khlam Covid-19 ba un sa pynjanai shuh-shuh ïalade ban shna ïa ki kali saw shaka bad ki arshaka bad ha katei ka por, u dang don tang kumba 13-14 snem ka rta.
Haba kylli mano ba ju ai mynsiem ïa u naduh nyngkong ki sngi ban shna ïa ki kali bad ki arshaka, u samla Mebalamlynti u la ïathuh ba ka jingai mynsiem ka dei na ïing-na sem kiba la ju ai mynsiem ïa u ba un dang ïai pynjanai ïa kaei-kaei kaba u sngewtynnad ban leh bad kumjuh ruh ki paralok-parajor jong u kiba ju don bynta ban ïarap bad ai mynsiem ïa u ha baroh ki liang.
Haba kylli la un dang ïai bteng ïa kane ka kam haduh lashai-lashisngi, u samla Mebalamlynti u la ong ba u don ka mynsiem ban dang ïai bteng beit ïa kane ka kam bad u angnud ruh ban dang leit phah pyntbit shuh-shuh ïalade ha kane ka kam da kaba un leit ban pule ha ka Mechanical Engineering hadien ka jingpyndep jong u ïa ka klas 12.
Na ka liang une u samla u la ai mynsiem ïa kiwei pat ki khun samla ka jaidbynriew ba kin ïeng ha la ki jong ki kjat bad kim dei ban shu ap khmih lynti na ki kam Sorkar hynrei haba ki don ïa kano-kano ka sap kim dei ban lehraiñ, ki dei ban mih shakhmat bad ban pynjanai shuh-shuh ïalade.
“Na ka liang jong nga hi, nga peit ban ong ka jingïohkam-ïohjam kam da dei kaba eh lada phi pyndonkam hok ïa ka sap kaba u Blei u ai ha phi bad ka lad kan plie beit hi. Nga peit ha kane ka juk mynta ban ap tang na ka jingïoh kam Sorkar, ngam ïohi shuh ba kan long namarba ka long kaba kham jynjar ban ïoh”, ong u samla Mebalamlynti.
Na ka liang u kpa jong u Mebalamlynti, u Bah Alarmingson Langstang u la ong ba kum u kpa u dap da ka jingsngewkmen kaba khraw ban ïohi ba u khun jong u, u la pyndonkam hok ïa kane ka sap jong u da kaba ai mynsiem lem ruh ïa kiwei pat ki khun samla ba kin mih shakhmat bad ïa ki kmie ki kpa jong ki ba kin pynshlur ïa ki khun jong ki haba ki don ïa kano-kano ka sap kyrpang kaba la ai da u Blei Nongbuh-Nongthaw.
