Washington, Iaiong:
Ki pulit ka US ki la iathuh ba uwei u nongseng kam na India, u la siat iap ia la ka kurim bad ia uwei na ki khun shynrang jong u ha la iing ha United States ha ka taiew ba la dep. Hadien kata, utei u briew u la pyniap hi noh syndon ialade.
Katei ka jingjia kaba la iathuh na Newcastle ha Washington, ka la jia ha ka 24 tarik jong u Lber.
Katba uwei pat u khun jong kitei shikurim u la lait im namar ba um don ha la iing ha ka por ba jia katei ka jingjia.
Ia kitei kiba iap baroh la ithuh kyrteng kum u Harshavardhana S Kikkeri (57 snem ka rta), ka kurim jong u- ka Shwetha Panyam (44 snem ka rta) bad u khun jong ki, 14 snem ka rta.
Ki nongpynbna khubor ha katei ka jaka ki la iathuh ba ki la iohi ia uwei u khynnah ba la ialam na katei ka iing bad la pyntngen ia u da ki nongtohkit. Na ka liang jong ka ophis jong ka King County Sheriff kam pat lah ban pynbna ia ki jingtip ba iadei bad kitei ki khynnah.
Ym pat lah ban tip mardor, la ong ki pulit, ba kaei ka jingpynkhih-win na ka bynta katei ka kam kaba palat pud. Wat la katta, ka jingtohkit ka dang iaid shakhmat ban lap ia ka daw jong katei ka jingjia baroh.
U Harshvardhan S Kikkeri, uba dei na ka KR Pet Taluk jong ka Elaka Mandya, u dei u nongseng bad CEO jong ka HoloWorld, ka kompeni robotics kaba don ha Mysuru. Ka kurim jong u pat ka dei ka nongseng lang jong katei ka kompeni.
Ha u snem 2017, ma u bad ka Shwetha ki la wanphai biang sha India bad ki la seng lang ïa ka HoloWorld. Namar ka khlam Covid-19, ka kompeni ka la weng noh ha u snem 2022 bad une u nongseng kam seng jam u la wanphai biang sha US.
Ha ka por ba u la pawnam bha, une u nongseng kam u la ïakynduh ïa u Myntri Rangbahduh ka ri u Narendra Modi ban ïakren da kaba pyndonkam ïa ki robot na ka bynta ban ïada ïa ki khappud.
Utei u briew, uba dei u riew shemphang ha ka kam shna robot, u la ju trei ruh ha ka Microsoft ha US.
