Shillong, Ïaïong 30
Ka Hynñiewtrep National Youth Front (HNYF) Sengkmie ka la pynrem jur ïa ka Sorkar Pdeng bad Sorkar Jylla ba kam lah ban pynbeit ïa ki kynrum-kynram kiba mih hapoh ka skulbah North-Eastern Hill University (NEHU) bad halor ka jingshah kem jong u President ka North-Eastern Hill University Student’s Union (NEHUSU), u samla Sandy Sohtun ha ka 28 tarik u Ïaïong, 2025.
Kum ban shu kdew hangne ba ki pulit ka East Khasi Hills ki la leit ban kem noh ïa u samla Sandy Sohtun ha ka 28 tarik u Ïaïong, 2025, halor ka ejahar ba la mudui da u Dr. Alok Singh uba dei u nonghikai jong ka sobjek Hindi ha katei ka skulbah halor ka jingkynnoh ba u President ka NEHUSU ryngkat bad 5 ngut ki la donkti ha ka ban shoh bad pynmynsaw ïa utei u nonghikai ha ka 24 tarik u Ïaïong, 2025, da kaba rung jubor hapoh ka kamra treikam jong u.
Katkum ka kyrwoh ba la phah da u General Secretary ka HNYF Sengkmie, Bah Tyllibor Swer, u la ong ba ha ka jaka ba ka Sorkar kan leit ban mih dalade bad ban pynbeit ïa ki kynrum-kynram hapoh katei ka jaka pule hynrei phewse, ki la phah pynban da ki pyrton pulit CRPF sha katei ka skulbah kaba long kumba kita ki khynnah pule ki dei ki lehnoh. U Bah Tyllibor u la ong ba kan long kaba bha lada ka Sorkar kan phah noh ïa ki pyrton pulit sha ki jaka ha khappud kiba dei ki jaka kiba donkam palat ïa ka lad jingïada na ki mynder ri.
Shuh-shuh, u Bah Tyllibor u la ong ba ka skulbah NEHU ka dei ka jaka pule kaba la lah ban sei ïa shibun ngut ki riewkhraw da kaba bynrap ba ki khun samla ki dei ka lawei jong ka jaidbynriew bad ong ba kum ka seng baroh kawei kan don ryngkat bad ki samla pule ka skulbah ha kano-kano ka por kaba donkam.
“Ka NEHU ka dei ka jaka pule kaba lah sei ïa shibun ngut ki riewkhraw. Kynmaw ba ki khun samla jong ngi ki dei ka lawei jong ka jaidbynriew, wat nym ai ding ïoh ka poi sha kaba ym lah ban tehlakam. Na ka liang ka seng, ngi ai ka jingkyrshan bapura ïa phi ki para samla pule jong ka NEHUSU bad ngi long kiba kloi ban don bad phi ha kano-kano ka khep,” ong ka kyrwoh ka seng.
