Jowai, Ïaïong 30
Ka jingïalehkai District Cricket League hapdeng ka Moodymmai SC bad ka Khliehtyrshi SC ka la shah pynthut noh ha u slap ha ka Sngi Balang.
Ha kane ka jingïakhun, ka Moodymmai SC ka la kam trai ban tied nyngkong ha kaba ka la ïoh 167 run bad shah pynhap 10 wiket ha ki 29.5 over. U Pyndap Lamin (not out) u la tied 44 run na ki 45 bol kynthup ïa 8 tylli ki ‘four’, u Lammi Passah 37 run na ki 42 bol ryngkat 4 tylli ki ‘four’ bad u Stewinson Ryngkhlem 30 run na ki 29 bol ryngkat ba kawei ka ‘six’bad lai tylli ki ‘four’. Katba ki nongkawang bol ka Khliehtyrshi SC ba kynthup u H. Timi Ryngkhlem bad u Wan O Rymbai ki la ïoh mar 3 wikets.
Shwa ban shimti ïa ka pali kaba ar da ka Khliehtyrshi SC, u slap uba jur u la hap bad pynlong ïa ka madan baroh kawei ban dap um smam.
Hadien katto katne por ki Umpire ki la leit ban peit bniah ïa ka jinglong jong ka madan bad shem ba kam long shuh ban dangbteng ïa ka jingïalehkai ba dangsah. Te kumta ki la hap ban pynsangneh noh bad ïamynjur lang ban ïasam mar shi point.
Ka jingïalehkai ha ka sngi Palei kan long hapdeng ka West Jaiñtia Police CC pyrshah ïa ka Northeast A. U. (ATS) ha ka por 9 baje mynstep.
