Khliehriat, Ïaïong 30
Ka lympung ïalehkai District Level Inter School Athletics Meet ba la pynlong da ka shlem treikam District Sports Officer (DSO), East Jaiñtia Hills District ryngkat ka jingïatreilang ka East Jaiñtia Hills District Football Association (EJHDFA) la sdang ha ka Sngi Balang ha madan ïalehkai Teilang Dkhiah West, East Jaiñtia Hills District.
Ha kane ka lympung la ïadonlang u Additional Deputy Commissioner ka East Jaiñtia Hills District u S.R Marak, u Additional Superintendent of Police ka EJHD Bah S. Pasleiñ, ka DSO kane ka district Kong Stephanie M. Rapsang, ki nongïalam bad dkhot nongkitkam jong ki synjuk ïalehkai bapher bapher, ki principal ki nonghikai bad ki khynnah skul.
Ha kane ka lympung ïalehkai kaba lai sngi lynter ki la don haduh 42 tylli ki jait jingïalehkai ba la shim bynta da 600 ngut ki khynnah na 23 tylli ki skul hapoh ka District ha la ki jong ki kyrdan ïalehkai kynthup ka Under-16 bad Under-18 kynthei bad shynrang.
Katto katne ki jingïalehkai ba la pyndep ha kane ka sngi sdang ki long ka Shot Put jong ki khynnah Under-16, ha kaba u Nightiful Sukhlain na Khliehriat Presbyterian Secondary School u la khur ïa ka takma ksiar, ïa ka takma rupa la khur da u Arwinki Rymbai na Wapung Higher Secondary School katba u Mutskhem Sari na Sein Jait Tuber Higher Secondary School u la khur ïa ka takma rnong.
Ha ka kyrdan Under-18 Boys, u Vincent Chyrmang na Wapung Higher Secondary School u la khur ïa ka takma ksiar bud sa u Ram Lyngdoh na Sein Jait Tuber Higher Secondary School bad u Edyson Dkhar na ka Sham Sham Secondary School kiba la khur ïa ka takma rupa bad takma rnong.
Ha ka High Jump jong ki khynnah shynrang kiba hapoh 18 snem ka rta, u Kynsai Rymbai na K.B. Memorial Secondary School u la khur ïa ka takma ksiar, katba u Heimonmi Dkhar na San Shnong Secondary School bad Daoshwa Dkhar na Wapung Higher Secondary School ki la khur ïa ka takma rupa bad takma rnong.
Ha ka Long Jump jong ki khynnah kynthei kiba hapoh 18 snem ka rta, ka Fancy Meliorate Siangshai na K.B Memorial Secondary School ka la khur ïa ka takma ksiar, katba ka Olivia Bareh na ka Ambrose Memorial Secondary School bad ka Juh Phawa na Sein Raij Branch (Jalyah) ki la khur biang ïa ka takma rupa bad rnong.
Ha ka jingïakob kawang sum ne Javelin Throw jong ki kynthei kiba hapoh 18 snem, ka Eunikilalthang-thhari Ngamlai na Khliehriat Presbyterian Higher Secondary School ka la ïoh ban khur ïa ka takma ksiar, katba ka Sathi Phawa na San Shnong Secondary School bad ka Tholinda Swer na Rymbai Government Secondary School ki la ïoh ban khur ïa ka takma rupa bad kum takma rnong.
