Shillong, Ïaïong 30
Kawei ka dukan die tiar dieng kaba don ha Fourth Furlong, Polo, ka la shah prong tuh ha ki runar bym lah ban ithuh kumjuh ban rah ei ka pisa bad ki tiar da ki lak tyngka.
Katkum ka khubor kaba la ïoh lum na ki pulit la ong ba ka Sarda Chettri ka la ujor sha ki pulit ba hapdeng ka miet jong ka 26 bad 27 tarik mynta u bnai, ki runar bym lah ban ithuh, ki la prong tuh hapoh ka dukan ‘furniture’ ka jong ka, kaba don ha Polo, Shillong bad ban tuh ïa ki tiar ki tar kiba shongdor haduh kumba T.1 lak.
Shuh shuh ka la ujor ba nalor ki tiar kiba la shah tuh, ki runar ki la ïoh ban rah ei ruh ïa ka pisa kaba long haduh T.3.5 lak. Ha kaba ïadei bad kane ka jingjia shah tuh, na ka liang jong ki pulit ki dang pynlong ïa ka jingtohkit ban lap ïa ki jingshisha bad kumjuh ruh ban thwet ïa ki runar kiba donkti ha kane ka kam.
Ha kawei pat ka khubor, la ong ba u Sahidul Rahman u la ujor sha ki pulit ba ha ka 24 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML08-H-7862 na ka shnong Chandigre ha West Garo Hills.
