Shillong, Ïaïong 30
Ka Nongkseh Sports Social and Cultural Club (SS&CC) ka la soi haduh 12 ngut ki rangïalehkai kiba thymmai hadien ba ki la lah ban pyndep ha ka Inter-Club Transfer ba la pynlong da ka Shillong Sports Association (SSA) na ka bynta ka lympung ïalehkai First Division 2025.
Ka jingpynkhlaiñ jong kane ka kynhun mynta ka aïom ka long namar ka don ïa ka jingangnud ban ïoh rung sha ka Shillong Premier League (SPL).
Ha kane ka jingsoi soskular kaba la sdang naduh 21 haduh 30 tarik mynta u bnai, kane ka klob ka la soi ïa ki rangïalehkai kiba kynsai kiba la ïashim bynta ha ka Shillong Premier League (SPL) lem bad uwei u rangïalehkai I-League.
Hadien ba ka la dep ban soi ïa u rangïalehkai I-League na ka Shillong Lajong FC, u Hardy Cliff Nongbri, ka Nongkseh ka la lah ban wanrah sa ïa u snar thep kol ka Mawlai Sports Club u Khrawkupar Jana, uba la lah ban thep haduh 9 kol ha ka SPL jong ka aïom ba la dep bad 12 kol ha ka Meghalaya State League 2024.
Kiwei pat ki rangïalehkai na ka Mawlai kiba ka la soi ki long u Baïaikara Swer, uba la thep 7 kol ha ka aïom ba la dep, kumjuh u Fullmoon Mukhim, Wanboklang Lyngkhoi bad u Banskhemlang Mawlong. Kiwei pat ki rangïalehkai kiba ka la soi ki long u Vickey Sharma na ka Langsning FC bad u Amand Biswa na ka Sawmer SC nalor kiwei pat.
Na ka Pohkseh SC, ki kynthup ïa u rangïalehkai shapdeng u Mickey Tynsong, kumjuh ïa u Mebankhraw Wahlang na ka Ryntih FC.
Shuh shuh kane ka klob ka la nang pynkhlaiñ ruh da kaba ka la soi ïa u rangapkol ka lahduh jong ka SPL ka Shillong Lajong u Guidle Syiemlieh. Ka la wanrah ruh ïa u rangïalehkai shakhmat na Lawsohtun SC u Kitboklang Pale.
Hynrei kane ka klob ka dang shaniah ha ka jingïalam u rangïa-lehkai shakhmat u Chesterpaul Lyngdoh kum u kapten, uba la noh synñiang da kaba thep 12 kol bad ïarap pynbuh bol ha ka samoi ba la dep. Une u rangïalehkai na Mawkyrwat u la ïasoh ryngkat ki hynñiew ngut ki rangïalehkai ha ka aïom ba la lah. Hapdeng katei ka jingpynkhlaiñ, ka Nongkseh ka la duh da ka said ban ïoh rung sha ka SPL ha ka aïom ba la lah.
Nalor kine, ka Nongkseh ka la pynkhreh ruh ban soi sa ïa u Chanmitre Thma, Shano Tariang bad u Pynbhalang Suting lyngba ka Centralised Registration System (CRS), namar ki dangïalehkai mynta na ki klob ha Kolkata bad Nagaland. La khmih lynti ba kane ka CRS transfer kan sdang ha u Jylliew mynta u snem.
Naduh ba la seng ha u snem 1969, ka Nongkseh SS&CC ka la long ka klob kaba la rim tam napdeng ki klob ka nongbah. Kane ka klob ka la ïashim bynta shitrhem ha ka Shillong League ba la pynïaid da ka SSA, ha kaba ka la mad ïa ki jingeh ha kine ki snem. Shisien ka la kiew kyrdan sha ka Super Division League (ba la tip mynta kum ka Shillong Premier League) ha u snem 2008.
Kane ka klob ka la pynbna ruh ba u Bah Richard Nongneng un shimti kum u coach.
