Nongpoh, Ïaïong 30
Ki paidbah nongshong shnong jong ka thaiñ Jorbil Killing ha Ri Bhoi District ha ka Sngi Balang ki la mih paidbah ban leit ai injek ïa ki ksew bad miaw kum shi bynta ban ïada na ka jingpang Rabies.
Kane ka jingai injek ïa ki ksew bad ki miaw ba la pynlong da ka tnat Veterinary jong ka Byrnihat hapoh katei ka shnong, ka dei hadien ba ka la don kawei longkmie kaba la duh noh ïa la ka jingim na ka jingpang Rabies ha kine ki khyndiat sngi ba la dep.
U Dr. Aiban Phankon ba dei khmih ïa ka tnat Veterinary, Byrnihat haba kren sha ki lad pathai khubor ha kane ka sngi, u la pynpaw ïa ka jingsngewkmen ban ïohi ïa ka jingwan jong ki paidbah ban ai injek ïa la ki ksew ki miaw ki jong ki ban lait na ka jingpang Rabies.
U Dr. Phankon u la ïathuh ruh kumba long mynta, kane ka jingpang kaba shyrkhei kaba ki briew ki lah ban ïoh da ka jingshah dait ha ki ksew bad ki miaw ka dei kaba shyrkhei haduh katta bad pyntip ruh wei ba la ngat bad ki dak ki shin (symptom) jong ka jingpang ka la paw, ym don dawai satia ban pynjem.
U la ïathuh ruh kumba long mynta hi, lada don kiba shah dait ha ki ksew ne ki miaw, ka don tang ka lad jingïada, da kaba ai inject kaba la tip kum kata ka Post-Exposure Prophylaxis (PEP) hashwa ba ki dak ki shin jong ka jingpang kan paw. Shuh, na ka liang u Dr Phankon u la ong ruh ba na ka liang ka tnat Veterinary kan dang bteng ban pynlong biang ïa kane ka jingai inject ïa ki ksew bad ki miaw ha ki por ban dang wan bad ha kane ka shnong bad ruh sha kiwei de ki shnong ba marjan.
