New Delhi, Ïaïong 30 (UNI)
Ka Sorkar ha ka Sngi Balang ka la thaw thymmai ïa ka National Security Advisory Board (NSAB) bad thung ïa u khlieh barim ka Research and Analysis Wing (RAW), u Alok Joshi kum Chairman bathymmai jong ka.
Kane ka Board ba la pynthymmai kaba don ïa 7 ngut ki dkhot ka kynthup ïa katto-katne ki heh shipai, Navy, Air Force, nalor ki heh jong ka Indian Police Service kum ki dkhot jong ka.
Ïa kane ka rai la shim ha ka jingïalang ‘High-Level’ ba la khot da u Myntri Rangbahduh ka ri, u Narendra Modi ban ïakren halor ka jingnang jur ka jingïakynad hapdeng ka India bad Pakistan bad ka jinglong-jingman ka jingshong shngaiñ ha ka ri.
Ka jingpynthymmai biang ïa ka Board ka long ban pynkhlaiñ ïa ka rukom pahara naba ka Board ka don ïa ka bynta kaba kongsan ha ka ban pynbiang ïa ka saiñdur khmih bniah ka ban neh slem bad ka jingai jingmut ïa ka polisi sha ka Sorkar halor ka jingshong shngaiñ jong ka ri bad ki kam bar-ri.
Ki dkhot bathymmai jong ka Board ki kynthup ïa u Air Marshal PM Sinha, u Lt General A.K. Singh, u Rear Admiral Monty Khanna, bad 2 ngut ki ophisar barim ka Indian Police Service – u Rajiv Ranjan Verma bad u Manmohan Singh.
Shuh shuh, u B. Venkatesh Varma, uba la shakri ha ka tnad Indian Foreign Service, u la shah thung ruh kum u dkhot jong kane ka Board kaba kynthup ïa 7 ngut ki dkhot.
