Shillong, Ïaïong 30
Ka World Audio Visual & Entertainment Summit (WAVES) 2025, ka jingïalang kaba pawnam ha ka pyrthei kaba rakhe ïa ka jingsaiñdur thymmai bad ka jingïatreilang ha ka kam pathai bad kam pynbyrngia, ka la pynkhreh ruh ban long ka jingrakhe kaba shitrhem ïa ka deiriti ha ka pyrthei.
Napdeng ki bynta ba la khmih lynti bha jong kane ka jingïalang ka dei ka WAVES Cultural & Concerts, ka tamasa ba ïadei bad ka deiriti kaba saw sngi ka ban sdang naduh 1-4 tarik Jymmang, 2025, ha Jio World Convention Centre (JWCC) ha Mumbai.
Kan don ruh ka jingpeit bniah ïa ka deiriti jong ka thaiñ shatei lam-mihngi jong ka ri, kaba pyni ïa ka pateng bad ki riti dustur ba riewspah jong ka thaiñ.
La pynkhreh hapoh ka phang “Connecting Creators, Connecting Countries,” ka prokram deiriti ka kynthup ïa ki jingshad kiba itynnad na baroh phra tylli ki jylla jong ka thaiñ shatei lam-mihngi, kaba pyni ïa ki nongpeitkai ïa ka jingïaid lynti ba kyrpang lyngba ka deiriti bapher bapher bad kaba iphuh-iphieng jong ka India. Na Assam, ka jingshad Sattriya ba la burom bha da ka Sattriya Kendra, Guwahati bad ka jingshad ba ïadei bad ka por ba la tip kum ka Gumrag jong ki riewlum kan pynhun ïa ki nongpeitkai. Ka Meghalaya ka wanrah ïa ka jingshad Wangala, ka jingai burom ïa u blei sngi, katba ka Sikkim ka wanrah ïa ka Tamang Selo kaba shitrhem bad ka Singhi Chham – ka jingshad ‘snow lion’ kaba don tynrai ha ka histori jong ka spah snem kaba 18. Ka jingshad Hojagiri ba pawnam jong ka Tripura kan khring da ki rukom ba pynïahap ïa ka bor tynrai jong ka, bad ka jingshad Manipuri ba la pynjanai bha jong ka Manipur da ka Jawaharlal Nehru Manipuri Dance Academy bad kan don ruh ka jingpyni ïa ka rukom ïakhun Thang-ta.
Ka Nagaland kan plie ïa ki jingrakhe deiriti da ki jingrwai ba sngewtynnad jong ki Tetseo Sisters, kaba pynneh pynsah ïa ka riti dustur Li ha ka ktien Chokri, ryngkat bad ka Nzanta – ka jingshad kynhun ba itynnad da ki longkmie jong ka jaidbynriew Lotha Naga. Ka Cheraw jong ka Mizoram, kaba la tip paidbah kum ka shad siej, kan ai ïa ka jingshad ba itynnad jong ka jingïadei bad ka jingsawa, katba ka Arunachal Pradesh kan pyni ïa ka jingshad ba itynnad jong ka Kaa Kingnara Kingnari, ka rukom shad ba la pynshong nongrim ha ki klew.
La wanrah ha ka jingïatreilang bad ka tnat Information & Broadcasting, ka tnat Deiriti, Sorkar Maharashtra, bad ki nongïatreilang kum ka YouTube, Spotify, bad Book My Show, ka prokram deiriti jong ka WAVES 2025 ka pynkhlaiñ ïa ka jingkut jingmut jong ka Summit ban pyni ïa ka jingstad ha ka kam saiñdur jong ka pyrthei.
