Shillong, Jymmang 01
Ka Jylla kan phah haduh 10 tylli ki jait jingïalehkai sha ka Khelo India Youth Games 2025 ka ban long ha Bihar naduh 4 haduh 15 tarik mynta u bnai.
Kine ki kynthup ïa ka Football kaba la ïoh lyngba ka direct entry, katba kiwei pat kiba la ïoh da ka wild card entry ki long ka Archery, Athletics, Bad-minton, Boxing, Cycling, Gymnastics, Judo, Shooting bad ka Swimming.
Ha shwa ba kin mih na ka nongbah, na ka liang ka tnat ïalehkai ka la ai khublei kitbok kitrwiang ïa kane ka kynhun ha ka jingïalang kaba la long ha State Convention Centre, Shillong ha kaba la ïadon lang u Myntri Rangbah ka Jylla u Conrad K. Sangma kum u kongsan kumjuh u Myntri ka tnat ïalehkai u Bah Shakliar Warjri kum u symbud kongsan, u Director ka tnat ïalehkai u D.D Shira, u Working President ka MSOA u Bah John F Kharshïing bad kiwei kiwei.
Te kumta na ka liang u Conrad bad u Bah Shakliar ki la ai ka jingkitbok kitrwiang ryngkat ka jingkyrkhu kyrdoh ïa baroh kane ka kynhun ba kin ïalehkai bha ha katei ka lympung khnang ba kan lah ban wanrah nam bad burom ïa ka Jylla hi baroh kawei.
Ka Chef De Mission ha kane ka lympung ka long ka Daisy Marweiñ (Senior Coach DSYA).
Lah ban pynkynmaw ba ha ka Khelo India Youth Games 2024, ka Jylla ka la khur ïa ka nam lahduh ha ka jingïa-lehkai phutbol bad ha u 2023 ka la khur ïa ka takma rnong.
