Shillong, Jymmang 01
Ka Barcelona bad ka Inter Milan ki la ïakhaid mar 3-3 kol ha ka semi final wat ba nyngkong jong ka Champions League ha ka sngi Palei ha Olympic Stadium.
U Lamine Yamal, 16 snem ka rta, u la pyni ïa ka jingïalehkai kaba itynnad. Ha kane ka jingïakhun la thep haduh 6 tylli ki kol, kynthup ïa ka kol kaba stet tam ha ka Champions League ha ka semi-final ba la thep da u Marcus Thuram tang hadien 30 sekhon.
Ka Inter Milan ka la lamkhmat ha ka ban thep kol lyngba ka jingstet u Thuram hadien ba u Inigo Martinez u la kum bakla ha ka por kaba kongsan, kaba la ailad ïa utei u rangïalehkai jong ka France hadien ka jingïarap pynbuh bol u Denzel Dumfries.
Katei ka kynhun ka la pynbud biang ïa ka kol kaba ar lyngba u Dumfries da kaba thep ïa ka bol kaba la pyndei da ka khlieh jong u Francesco Acerbi.
U Yamal, uba la mih madan ha ka sien kaba 100 na ka bynta ka Barcelona, u la lah ban pynphai kylla, ha kaba u la kylla long u rangïalehkai ba khynnah tam ban thep kol ha ka semi-final jong ka Champions League.
Hadien shiteng kynta u Ferran Torres u la lah ban pynïakhaid na ka bynta ka Barcelona hadien 38 minit hadien ba u Raphinha u la ïoh ban pyndei da ka khlieh na ka bynta ban pynbol sha ka jaka ba don u Pedri.
Ha ka kylla miet la ïohi ba baroh ar tylli ki kynhun ki la bteng ïa ka jinglah ban ïakhun pyrshah. U Dumfries u la pynbud biang ïa ka kol kaba ar jong u na ka bynta ka Inter ha kaba u la thep da ka khlieh.
Ka Barcelona ka la lah ban pynïakhaid lyngba u Raphinha uba la shut beit beit sha kol, hynrei u rangapkol ka Inter u Yann Sommer u la pyndei da ka khlieh da ka jingthmu ban pyllait na ka jingshah thep.
“Ka jingailad ban thep bun kol ka long kaba ym lah ban pdiang, hynrei ngi hap ruh ban ai burom ïa ka Inter, ki la ïalehkai bha. Kaba kongsan ka long ba ngi ieh ha ka jingmih na kane ka jingïakhun,” ong u Raphinha hadien ba la kut ka jingïalehkai.
“Hadien ka jingshah rem lai sien lynter, ngi ïohi Inter kaba shisha mynta ka miet. Ngi la ïalehkai naduh ka mynsiem bad nga sngewsarong ha kane ka jinglah ban thep kol,” la ong u Dumfries.
“U Yamal u dei u rangïalehkai uba kha man la ka 50 snem”, la ong u coach jong ka Inter u Simone Inzaghi.
Kine ki kynhun kin pynkhreh ïa ka semi final wat ba ar ha ka sngi Ba-ar ha Milan bad ka kynhun ka ban ïoh jingjop kan ïoh rung sha ka final ka ban long ha Munich ha ka 31 tarik mynta u bnai.
